Og‘ir ahvoldagi ona va qiz Vatanga qaytarildi
Turkiyada og‘ir vaziyatga tushib qolgan o‘zbekistonlik ona va qizga yordam ko‘rsatilib, ular Vatanga qaytarildi. Bu haqda Zamin.uz xabar berdi.
O‘zbekistonning Istanbul shahridagi Bosh konsulxonasi va Migratsiya agentligi vakolatxonasi tomonidan yurtdoshimizga zarur yordam ko‘rsatilgan. Ma’lum bo‘lishicha, ayol mehnat migratsiyasi maqsadida Turkiyada bo‘lgan, biroq og‘ir kasallik tufayli ishlash imkoniyatini yo‘qotgan.
Shundan so‘ng, u diplomatik vakolatxonaga murojaat qilgan. Aniqlanishicha, ayolning oyog‘i singan bo‘lib, jarrohlik amaliyoti va protez o‘rnatish ishlari muvaffaqiyatli amalga oshirilgan.
Biroq uzoq davolanish va ishga layoqatsizlik tufayli oilaning moddiy ahvoli yanada og‘irlashgan. Konsulxona tomonidan qo‘shimcha yordam ko‘rsatilgan.
Bundan tashqari, ayolning 12 yoshli qizi maxsus parvarishga muhtoj ekani aniqlangan va bu masala ham alohida ko‘rib chiqilgan. Bosh konsulxona tashabbusi bilan “O‘zbekiston madaniyati, birdamlik va hamkorlik jamiyati”, “Uzbekistan Airways”ning Turkiyadagi vakilligi va diaspora faollari ko‘magida ona va qiz yurtga qaytarilgan.
Hozirda ularning davolanish va reabilitatsiya jarayonlari Ijtimoiy himoya milliy agentligi, Oila va xotin-qizlar qo‘mitasi hamda mahalliy hokimiyat organlari tomonidan davom ettirilmoqda. Mazkur holat one.uz saytida yoritilgan.
