O‘zbekiston Yevroosiyo iqtisodiy ittifoqining yagona tranzit tizimiga qo‘shilish bo‘yicha ishlarni boshlashga tayyorligini tasdiqladi. Bu haqda Zamin.uz xabar berdi.
Bu haqda 13-noyabr kuni Yevroosiyo iqtisodiy ittifoqining bojxona hamkorligi bo‘yicha vaziri Ruslan Davыdov va O‘zbekiston Davlat bojxona qo‘mitasi raisi Akmalxo‘ja Mavlonov o‘rtasida bo‘lib o‘tgan uchrashuvda ma’lum qilindi. Yagona tranzit tizimiga qo‘shilish bojxona jarayonlarini soddalashtirish va yuklarni tezroq yetkazib berishga xizmat qiladi.
Bu tashabbus nafaqat tranzit jarayonlarini yengillashtiradi, balki tashqi savdoni shaffoflashtirish va nazoratni kuchaytirishga ham yordam beradi. Uchrashuv davomida tovarlar va transport vositalari haqidagi bojxona ma’lumotlarini almashish masalalari ham muhokama qilindi.
Ruslan Davыdov uchrashuv chog‘ida O‘zbekistondagi target-markaz va elektron deklaratsiya markazi faoliyati bilan yaqindan tanishdi. U nazorat jarayonlariga sun’iy intellektni joriy etish va inspektorlar ishini baholash tizimining ahamiyatini alohida ta’kidladi.
Bundan tashqari, YEOT doirasida elektron navigatsiya plombalaridan foydalanish imkoniyatlari ham ko‘rib chiqildi. Xususan, Toshkent—Sankt-Peterburg yo‘nalishida mazkur texnologiyani qo‘llash istiqbollari muhokama qilindi.
Mazkur hamkorlik tashqi savdo jarayonlarini zamonaviylashtirish va xalqaro transport tizimini takomillashtirishga xizmat qilishi kutilmoqda. Ma’lumot manbasi: zamin.uz.
