O‘zbekiston va Turkmaniston hamkorligi yangi bosqichda
O‘zbekiston Prezidenti Shavkat Mirziyoyev va Turkmaniston Prezidenti Serdar Berdimuhamedov Toshkentda, Ko‘ksaroy qarorgohida rasmiy delegatsiyalar ishtirokida kengaytirilgan muzokaralar o‘tkazdi. Bu haqda Zamin.uz xabar berdi.
Davlat rahbarlari uchrashuv avvalida Turkmaniston Prezidentining O‘zbekistonga davlat tashrifi ikki qardosh xalq orasidagi ko‘p asrlik do‘stlik va yaxshi qo‘shnichilik aloqalarining mustahkamligini ko‘rsatuvchi muhim voqea ekanini ta’kidladilar. Muzokaralarda ikki davlat o‘rtasidagi do‘stlik, yaxshi qo‘shnichilik va strategik sheriklik munosabatlarini yanada mustahkamlash masalalari muhokama qilindi.
Savdo, transport, energetika, suv xo‘jaligi kabi sohalarda erishilgan yutuqlar yuqori baholandi. Shuningdek, so‘nggi yillarda o‘zaro savdo hajmining ikki baravar oshib, 1 milliard dollardan oshgani qayd etildi.
Yaqin kelajakda bu ko‘rsatkichni 2 milliard dollarga yetkazish uchun barcha imkoniyatlar mavjudligi ta’kidlandi. “Shovot–Toshhovuz” chegaraoldi savdo zonasining ishga tushirilishi tovar ayirboshlashni rivojlantirishda muhim qadam sifatida e’tirof etildi.
Ushbu tajribani “Olot–Farab” hududida ham qo‘llash bo‘yicha kelishuvga erishildi. Sanoat kooperatsiyasini kengaytirish maqsadida qurilish materiallari, farmatsevtika, oziq-ovqat mahsulotlari va boshqa talab yuqori bo‘lgan tovarlarni ishlab chiqarish bo‘yicha yangi qo‘shma loyihalarni amalga oshirish muhimligi ta’kidlandi.
Energetika sohasida istiqbolli konlarni birgalikda o‘zlashtirish va hamkorlikni yanada chuqurlashtirish bo‘yicha kelishuvlar imzolandi. Transport sohasida esa yuk tashish hajmini oshirish, bojxona va logistika jarayonlarini soddalashtirish, shuningdek, Turkmanboshi portini birgalikda rivojlantirish masalalari muhokama qilindi.
Tomonlar Toshkent va Ashxobod o‘rtasida to‘g‘ridan-to‘g‘ri aviaqatnovlarni qayta tiklashga kelishib oldi. Gumanitar sohadagi hamkorlikning ahamiyati alohida qayd etildi.
Urganch va Toshkentda o‘tkazilgan Turkmaniston madaniyati kunlari va turkman filmlari namoyishlari katta qiziqish uyg‘otgani ta’kidlandi. Kelgusida o‘zaro konsertlar, teatr safarlari, Xivada yoshlar forumini tashkil etish va qo‘shma filmlar ishlab chiqarish bo‘yicha kelishuvlarga erishildi.
Muzokaralar yakunida davlat rahbarlari erishilgan barcha kelishuvlarni amalga oshirish bo‘yicha “yo‘l xaritasi”ni tayyorlash va tasdiqlash bo‘yicha topshiriqlar berdi. Rasmiy uchrashuvlar natijalari ikki davlat o‘rtasidagi hamkorlikni yangi bosqichga olib chiqishi kutilmoqda.
Manba: zamin.uz
