Sanitar xulosa olish tartibi soddalashtirildi
Hukumat tomonidan yangi qaror qabul qilinib, oziq-ovqat va qishloq xo‘jaligi mahsulotlariga sanitariya-epidemiologik xulosa berish tartibi yangilandi. Bu haqda Zamin.uz xabar berdi.
Ushbu reglament ishlab chiqaruvchilar, importyorlar va tadbirkorlar uchun aniq, tushunarli va tezkor mexanizmlarni joriy etishni maqsad qilgan. Endilikda mahsulotlarga beriladigan sanitar xulosa uch yilgacha amal qiladi.
Bu esa tadbirkorlar uchun ortiqcha byurokratik jarayonlarni kamaytirib, ish jarayonlarini barqarorlashtiradi. Shuningdek, chetdan keltirilgan mahsulotlarga xulosa yaroqlilik muddatiga mos ravishda rasmiylashtiriladi.
Agar mahsulotning yaroqlilik muddati ko‘rsatilmagan bo‘lsa, unga muddatsiz xulosa berilishi mumkin. Davlat nazoratining asosiy maqsadi — bozorga xavfsiz va iste’molchilar uchun ishonchli mahsulot chiqishini ta’minlashdir.
Sanitar xulosa olish quyidagi holatlarda talab etiladi: yangi turdagi mahsulot ishlab chiqarilganda, mavjud mahsulot tarkibi o‘zgartirilganda, texnologik jarayon yoki jihozlarda o‘zgarishlar kiritilganda, tajriba mahsulotlari tayyorlanganda, respublikaga import qilinadigan mahsulotlar uchun va xulosa muddati tugaganda. Ariza beruvchilar xulosa olish uchun Davlat xizmatlari markazlariga murojaat qilishlari yoki my.gov.uz portali orqali onlayn ariza yuborishlari mumkin.
Bu jarayon tadbirkorlar uchun ortiqcha qog‘ozbozlikni bartaraf etishga qaratilgan. Barcha xulosalar elektron shaklda QR-kod bilan tasdiqlanadi va bir ish kuni ichida arizachining shaxsiy kabinetiga yuboriladi.
Yangi reglament iste’molchilar xavfsizligini oshirish, bozordagi mahsulot sifati ustidan nazoratni kuchaytirish va tadbirkorlar uchun qulay sharoit yaratishga xizmat qiluvchi muhim qadam sifatida baholanmoqda. Manba: One.uz.
