Qashqadaryo viloyatida noqonuniy oltin savdosi bilan bog‘liq holat fosh etildi. Bu haqda Zamin.uz xabar berdi.
Davlat xavfsizlik xizmati viloyat boshqarmasi hamda Iqtisodiy jinoyatlarga qarshi kurashish departamenti xodimlari tomonidan Samarqand viloyati, Kattaqo‘rg‘on tumanida o‘tkazilgan tezkor tadbir davomida qonunga xilof ravishda oltin savdosi bilan shug‘ullangan shaxslar qo‘lga olindi. Aniqlanishicha, Navoiy va Samarqand viloyatlarida yashovchi, 1982, 1984 va 1996-yillarda tug‘ilgan uch nafar fuqaro jami 475 gramm og‘irlikdagi ikki bo‘lak oltin quymasini sotishga kelishib, xaridordan avvaldan 500 million so‘m pul olgan vaqtlarida ashyoviy dalillar bilan ushlangan.
Davlat asillik darajasi nazorati inspeksiyasi tomonidan berilgan xulosaga ko‘ra, 994 asillik darajasiga ega bo‘lgan ushbu oltin quymalarning sof og‘irligi 472 grammni tashkil etib, ularning umumiy qiymati 740,4 million so‘mga tengligi aniqlangan. Hozirda mazkur holat yuzasidan Jinoyat kodeksining 177-moddasi 4-qismi "a" bandi bilan jinoyat ishi qo‘zg‘atilib, tergov harakatlari olib borilmoqda.
Ma’lum bo‘lishicha, ushbu shaxslardan ikki nafari ilgari sudlangan bo‘lib, ulardan biri hozirda axloq tuzatish ishlari jazosini o‘tamoqda.
