O‘zbekiston va Pokiston o‘rtasida aviaqatnovlar yo‘lga qo‘yiladi
O‘zbekiston va Pokiston o‘rtasida to‘g‘ridan-to‘g‘ri aviaqatnovlarni yo‘lga qo‘yish rejalashtirilmoqda. Bu haqda Zamin.uz xabar berdi.
Ushbu xabar The Express Tribune nashri tomonidan tarqatildi. Mazkur masala Pokiston va O‘zbekiston o‘rtasidagi hamkorlikka bag‘ishlangan sakkizinchi sessiya davomida muhokama qilingan.
Pokiston bosh vazirining sanoat va ishlab chiqarish masalalari bo‘yicha maxsus yordamchisi Harun Axtar Xonning ta’kidlashicha, to‘g‘ridan-to‘g‘ri aviaqatnovlar ikki mamlakat o‘rtasidagi savdo imkoniyatlarini kengaytiradi. Shuningdek, bu O‘zbekistonni Fors ko‘rfazi va Yevropa davlatlari o‘rtasida muhim bog‘lovchi o‘ringa ega bo‘lishiga zamin yaratadi.
Harun Axtar Xonning so‘zlariga ko‘ra, Pokiston hukumati tegishli idoralarga va aviakompaniyalarga mazkur qatnovlarni tezroq yo‘lga qo‘yish, shuningdek, ularning barqarorligini ta’minlash yuzasidan topshiriqlar bergan. Ushbu tashabbus ikki davlat o‘rtasidagi iqtisodiy aloqalarni mustahkamlashga xizmat qilishi kutilmoqda.
