Uzbekistan Airways floti to‘rtta yangi A321neo bilan kengayadi
Uzbekistan Airways aviakompaniyasi Xitoyning CALC lizing kompaniyasi bilan to‘rtta yangi Airbus A321neo samolyotini yetkazib berish bo‘yicha kelishuvga erishdi. Bu haqda Zamin.uz xabar berdi.
Mazkur kelishuv doirasida tomonlar o‘zaro anglashuv xatlarini imzoladi. Samolyotlarni 2027–2028 yillarda yetkazib berish rejalashtirilgan.
Yangi aerobuslar ikki sinfga mo‘ljallangan joylashuvga ega bo‘lib, Airspace Premium qulay salonlari bilan jihozlanadi. Shuningdek, samolyotlarda zamonaviy ko‘ngilochar tizim va yuqori tezlikdagi Wi-Fi mavjud bo‘ladi.
Bu yo‘lovchilarga yanada qulayroq parvoz imkoniyatini yaratadi. CALC bilan hamkorlik bir necha yildan buyon davom etmoqda.
Ushbu yangi bitim Uzbekistan Airways kompaniyasining 2026–2028 yillarga mo‘ljallangan uzoq muddatli floti yangilash dasturining muhim qismini tashkil etadi. Rejaga ko‘ra, aviakompaniya CALC’dan jami olti dona A321neo samolyotini qabul qiladi.
Shu tariqa, A321neo modelidagi samolyotlar soni kompaniya flotida 15 taga yetadi. Uzbekistan Airways boshqaruvi raisi Shuxrat Xudoyqulov aviakompaniya floti muntazam yangilanayotganini, yangi texnologiyalar joriy etilayotganini va xizmat ko‘rsatish sifati doimiy ravishda yaxshilanayotganini ta’kidladi.
Uning so‘zlariga ko‘ra, A321neo samolyotlari tejamkorlik, ilg‘or texnik yechimlar va yo‘lovchilar uchun yuqori darajadagi qulaylikni o‘zida mujassam etgan. Bu esa kompaniyaning mintaqaviy va xalqaro bozorlar talablariga javob beruvchi yetakchi aviakompaniya sifatidagi mavqeini mustahkamlashga xizmat qiladi.
