Toshkent bozorlarida avtoturargoh va suratga olish narxlari belgilandi
Toshkent shahar hokimining yangi qaroriga ko‘ra, poytaxtdagi yirik bozorlar va savdo majmualarida xizmatlar tariflari qayta ko‘rib chiqildi. Bu haqda Zamin.uz xabar berdi.
Ushbu tartib avtoturargohlar bilan birga tijoriy maqsadlarda video va foto suratga olish xizmatlariga ham taalluqli bo‘ldi. Hujjatda belgilanishicha, bozorlar atrofidagi avtoturargohlarda yengil avtomobillar uchun to‘lov miqdori haftaning kunlariga qarab o‘zgaradi.
Ish kunlarida narxlar past bo‘lsa, dam olish kunlari oshiriladi. Masalan, shanba va yakshanba kunlari 3 soatgacha turish uchun 25 ming so‘m, 4 soatdan ortiq vaqt uchun esa 50 ming so‘m to‘lanadi.
Mutasaddilar bu qaror orqali avtoturargohlardagi tirbandlikni kamaytirish va harakat xavfsizligini ta’minlashni maqsad qilgan. Shuningdek, yangi qarorga binoan, bozorlar hududida tijoriy maqsadlarda video yoki foto suratga olish uchun alohida to‘lov joriy qilindi.
Tijoriy kontent tayyorlash, masalan, reklama materiali, klip yoki videorolik yaratish uchun har bir soatga 5 million so‘m to‘lanishi belgilangan. Bu talab asosan blogerlar, reklama kompaniyalari va prodakshn studiyalariga qaratilgan.
Biroq ommaviy axborot vositalari va xorijlik sayyohlar uchun ushbu cheklovlar qo‘llanilmaydi. Ular jurnalistik yoki turistik maqsadlarda suratga olish uchun hech qanday ruxsatnoma yoki to‘lov talab qilmasdan faoliyat yuritishlari mumkin.
Yangi tartib poytaxt bozorlari infratuzilmasini rivojlantirish, tartib-intizomni oshirish va tijoriy faoliyatning shaffofligini ta’minlashga xizmat qilishi ta’kidlanmoqda. Manba: zamin.uz
