Bozorlarda tijoriy suratga olish pullik bo‘ladi
Toshkent shahar hokimligining xabariga ko‘ra, bozorlarda tijoriy videotasvirga olishdan tushadigan mablag‘lar savdo majmualarining infratuzilmasini yaxshilash va hududlarni obodonlashtirishga yo‘naltiriladi. Bu haqda Zamin.uz xabar berdi.
Ushbu tartib oddiy tashrif buyuruvchilarga taalluqli emas. Bozorga kelgan oddiy xaridorlar o‘z xaridlarini suratga olishlari yoki oilasi bilan bepul suratga tushishlari mumkin.
Biroq, bozor hududida daromad olish maqsadida faoliyat yuritayotgan yirik blogerlar yoki tijoriy suratga olish studiyalari belgilangan to‘lovni amalga oshirishlari kerak bo‘ladi. Hokimlik bayonotida mazkur chora-tadbirlar aholining manfaatlarini himoya qilishga, bozorlardagi infratuzilmani yaxshilashga va savdo jarayonlarini qulaylashtirishga qaratilgani ta’kidlangan.
Shuningdek, bozor hududida maxsus uskunalar bilan ishlaydigan suratga olish guruhlari faoliyati ba’zan piyodalar yo‘laklari va ma’muriyat ishlariga ortiqcha yuklama keltirib chiqarishi qayd etilgan. Ushbu chora-tadbirlar bozorlardagi tartibni saqlash va savdo muhitini yaxshilash uchun amalga oshirilmoqda.
Hokimlikning maqsadi xaridorlar va sotuvchilarga qulay sharoit yaratishdir.
