O‘zbekistonda ekologiya va turizm bo‘yicha yangi islohotlar

O‘zbekiston Prezidenti Shavkat Mirziyoyev turizm va ekologiya sohalarini rivojlantirish maqsadida yangi qarorlar qabul qildi. Bu haqda Zamin.uz xabar berdi.

Ushbu qarorga ko‘ra, Turizm qo‘mitasi alohida davlat organi sifatida ajratiladi. Shu bilan birga, Ekologiya vazirligi negizida Milliy ekologiya va iqlim o‘zgarishi qo‘mitasi tashkil etiladi.

Yangi qo‘mita Vazirlar Mahkamasi tarkibidan chiqarilib, unga Prezidentning ekologiya masalalari bo‘yicha maslahatchisi rahbarlik qiladi. Milliy ekologiya qo‘mitasi bir qator muhim loyihalarni amalga oshiradi.

Xususan, «Chiqindilarsiz hudud», «Toza havo», «Yashil makon», «Ekokultura» va «Bionasldorlik» kabi milliy dasturlarni amalga oshirish uning asosiy vazifalaridan biri bo‘ladi. Shuningdek, qo‘mita tarkibida «Ekoloyihalar fabrikasi» va Ekologik politsiya tashkil etiladi.

Ekologik politsiya xodimlariga maxsus vositalar, xizmat qurollari va kamerali formalar bilan ta’minlash ko‘zda tutilgan. Qarorga ko‘ra, Milliy ekologik monitoring markazi faoliyatini yo‘lga qo‘yish masalalari ham muhokama qilingan.

2026-yil sentabr oyiga qadar ekologiya sohasida yagona onlayn platforma ishga tushiriladi. Bundan tashqari, I va II toifadagi korxonalar 2026-yil 1-martga qadar fon monitoringi stansiyalarini o‘rnatishi shart qilib belgilandi.

Ushbu talab bajarilmasa, korxonalarga nisbatan kompensatsiya to‘lovlari besh barobarga oshiriladi. Ekologik qonunbuzarliklarning oldini olish maqsadida daraxtlarni kesish yoki ko‘chirish bo‘yicha ruxsatnomalar berish tartibi qat’iylashtiriladi.

Ekologik talablarni buzgan holda ruxsatnoma berish taqiqlanadi. 2026-yil aprel oyidan boshlab fuqarolar o‘rmon fondiga kirmaydigan daraxtlarning noqonuniy kesilishiga qarshi tashabbus ko‘rsatish imkoniyatiga ega bo‘ladilar.

Bu kabi chora-tadbirlar ekologik muvozanatni saqlash va atrof-muhitni himoya qilishga qaratilgan. Manba: davlat rahbari matbuot xizmati.