O‘zbekiston Flexrotor dronlarini xarid qilmoqda
O‘zbekiston Airbus Helicopters kompaniyasining Flexrotor nomli uchuvchisiz uchish qurilmalarini xarid qiladi. Bu haqda Zamin.uz xabar berdi.
Ushbu shartnoma Birlashgan Arab Amirliklarida joylashgan “Uztechtrade” korxonasi bilan imzolangan. Bu haqda Airbus Helicopters vitse-prezidenti Olivye Mishalon ma’lum qildi.
Uning so‘zlariga ko‘ra, ushbu kelishuv O‘zbekiston uchun muhim ahamiyatga ega, chunki mamlakatimiz Markaziy Osiyoda Flexrotor dronlarini xarid qilgan birinchi davlatga aylanadi. Flexrotor qurilmalari asosan razvedka va hudud kuzatuvi uchun mo‘ljallangan.
Ishlab chiqaruvchilarning ma’lumotiga ko‘ra, bu dronlarning asosiy afzalliklari uzoq vaqt (14 soatgacha) parvoz qilish imkoniyati, yuqori manevrchanligi va kichik maydonchalardan, jumladan, dengiz kemalaridan foydalanish qobiliyatidir. Ularni murakkab uskunalarsiz boshqarish mumkinligi ham muhim jihatlardan biri hisoblanadi.
O‘zbekiston ushbu dronlarni vertolyotlar bilan birgalikda murakkab operatsiyalarda qo‘llashni rejalashtirmoqda. Bu usul orqali vazifalarni yanada samarali bajarish ko‘zda tutilgan.
Ma’lumki, O‘zbekiston armiyasi safida Eurocopter AS532 va Eurocopter AS550 kabi yevropalik vertolyotlar ham mavjud. Bu texnikalar yangi dronlar bilan birgalikda harbiy salohiyatni oshirishga xizmat qiladi.
