Uzbekistan Airways to‘rtta Airbus A321neo ijaraga oladi
Uzbekistan Airways aviakompaniyasi Xitoyning CALC kompaniyasi bilan to‘rtta Airbus A321neo samolyotini ijaraga olish bo‘yicha shartnoma imzoladi. Bu haqda Zamin.uz xabar berdi.
Mazkur samolyotlar ikki sinfga mo‘ljallangan bo‘lib, ularning yetkazib berilishi 2027-2028 yillarga rejalashtirilgan. Bu haqda Uzbekistan Airways matbuot xizmati xabar berdi.
Yangi samolyotlar zamonaviy Airspace Premium salonlari va ko‘ngilochar qurilmalar bilan jihozlanadi. Bundan tashqari, yo‘lovchilar parvoz davomida simsiz yuqori tezlikdagi internetdan foydalanish imkoniyatiga ega bo‘ladilar.
Ushbu qulayliklar yo‘lovchilarga yanada samarali va qulay parvoz sharoitini taqdim etadi. Uzbekistan Airways boshqaruv kengashi raisi Shuxrat Xudoyqulovning ta’kidlashicha, Airbus A321neo samolyotlari yuqori samaradorlik va ilg‘or texnologiyalarni birlashtiradi.
Ular nafaqat yo‘lovchilar uchun qulaylik yaratadi, balki aviakompaniyaning barqaror rivojlanish va xalqaro bozorda raqobatbardoshlikni oshirish strategiyasiga ham mos keladi. Mazkur kelishuv Uzbekistan Airways aviatsiya parkini yangilash va kengaytirish bo‘yicha uzoq muddatli rejalarining bir qismi hisoblanadi.
2028 yilga kelib, kompaniya parkidagi Airbus A321neo samolyotlari soni 15 taga yetishi kutilmoqda. Bu esa aviakompaniyaning xalqaro aviatsiya bozorida o‘z o‘rnini mustahkamlashiga xizmat qiladi.
