Nogironligi bo‘lganlarga ish va foizsiz kreditlar beriladi
O‘zbekiston Prezidenti ehtiyojmand oilalarning ijtimoiy himoyasini kuchaytirish bo‘yicha muhim chora-tadbirlarni belgiladi. Bu haqda Zamin.uz xabar berdi.
Prezidentning ta’kidlashicha, bundan buyon daromad topish imkoniyati cheklangan shaxslar va nogironligi bo‘lgan fuqarolar kambag‘allar reyestriga kiritilmaydi. Ularni qo‘llab-quvvatlash to‘liq davlat zimmasiga olinadi.
2024-yildan boshlab “Teng imkon – inklyuziv bandlik” nomli yangi loyiha amalga oshiriladi. Ushbu loyiha doirasida nogironligi bo‘lgan 40 ming kishini ish bilan ta’minlash rejalashtirilgan.
Bandlik jamg‘armasi orqali ularga 30 million so‘mgacha bo‘lgan foizsiz kredit ajratish mexanizmi yo‘lga qo‘yiladi. Shu bilan birga, kambag‘allikka qayta tushish xavfi mavjud oilalarga ijtimoiy yordam va imtiyozlar saqlab qolinadi.
Bunday oilalar 6 oy davomida moddiy yordam va bolalar nafaqasini oladi, bog‘cha va to‘garak xarajatlari qoplanadi. Shuningdek, ular davolanish uchun orderlar va 12 oy davomida boshqa 110 turdagi ijtimoiy xizmatlardan foydalanish imkoniga ega bo‘ladi.
Og‘ir hayotiy sharoitlar tufayli kambag‘allikka tushib qolish xavfi yuqori bo‘lgan oilalarni oldindan aniqlash va ularga manzilli yordam ko‘rsatish choralari ham ko‘riladi. Ushbu vazifalarning ijrosi ustidan nazoratni Ijtimoiy himoya milliy agentligi direktorining birinchi o‘rinbosari Shahnoza Mirziyoyeva amalga oshiradi.
(Manba: zamin.uz)
