Uzunda kambag‘allik kamaydi, Denov va Chiroqchida hokimlar ishdan olindi
Uzun tumani 2023-yilda kambag‘allikni qisqartirish va aholi bandligini oshirish borasida muvaffaqiyatli natijalarga erishgani sababli namunaviy hudud sifatida e’tirof etildi. Bu haqda Zamin.uz xabar berdi.
Tumanga ajratilgan 160 milliard so‘m mablag‘, 70 million dollar miqdoridagi xorijiy investitsiyalar va ishga tushirilgan 47 ta yangi korxona tufayli minglab aholi ish bilan ta’minlandi. Natijada, tumandagi kambag‘allik darajasi yil boshida 10,5 foiz bo‘lgan bo‘lsa, yil oxirida bu ko‘rsatkich 3 foizgacha kamaydi.
Biroq Denov tumanida vaziyat aksincha kechdi. Ajratilgan mablag‘larning maqsadli sarflanmagani va kambag‘al oilalar ro‘yxatidagi 1 200 ta oilaning daromadida hech qanday ijobiy o‘zgarish kuzatilmagani tuman hokimligi faoliyatining samarasizligini ko‘rsatdi.
Qolaversa, Denovga Uzunga nisbatan 4,5 barobar ko‘proq resurs ajratilgan bo‘lsa-da, natijalar yetarli darajada bo‘lmadi. Shuningdek, Chiroqchi tumanida tadbirkorlikni rivojlantirish uchun ajratilgan 309 milliard so‘m kredit mablag‘lari ham samarali ishlatilmagani ma’lum bo‘ldi.
Hokimiyat tomonidan aholiga mos tayyor loyihalar taqdim etilmagani sababli mablag‘lardan oqilona foydalanilmagan. Yuqoridagi kamchiliklar sababli Denov hokimi I.
Abrorov va uning birinchi o‘rinbosari Sh. To‘raqulov, shuningdek, Chiroqchi hokimi F.
Yusupov va uning birinchi o‘rinbosari Z. Ergashevni lavozimidan ozod etish qarori qabul qilindi.
Ushbu choralar hududlarda ijtimoiy-iqtisodiy dasturlarni samarali amalga oshirishni ta’minlash maqsadida ko‘rilgan. Manba: zamin.uz
