Denov va Chiroqchi hokimlari ishdan olindi
O‘zbekiston Respublikasi Prezidenti Shavkat Mirziyoyev rahbarligida o‘tkazilgan yig‘ilishda ishsizlikka qarshi kurash masalalari ko‘rib chiqildi. Bu haqda Zamin.uz xabar berdi.
Yig‘ilish davomida Denov va Chiroqchi tumanlari rahbarlarining faoliyati qoniqarsiz deb topildi. Shu sababli, Denov tumani hokimi Ilhom Abrorov, Chiroqchi tumani hokimi Fayzulla Yusupov hamda ularning o‘rinbosarlari lavozimidan ozod etildi.
Ma’lum qilinishicha, Ilhom Abrorov 2023-yil yanvar oyidan 2025-yil noyabrigacha Denov tumaniga rahbarlik qilgan. Fayzulla Yusupov esa 2023-yil avgust oyidan joriy yil noyabrigacha Chiroqchi tumanini boshqargan.
Ularning ishdan bo‘shatilishiga asosiy sabab qashshoqlikka qarshi kurashda kutilgan natijalarga erishilmagani bo‘ldi. Yig‘ilishda Denov tumanida aholini ish bilan ta’minlash ishlari sust tashkil etilgani ta’kidlandi.
Tumanga Uzun tumaniga qaraganda 4,5 baravar ko‘p mablag‘ ajratilgan bo‘lsa-da, 1,2 ming oilaning daromadi oshmagan. Xuddi shunday holat Chiroqchi tumanida ham kuzatilgan.
2025-yilda Chiroqchida tadbirkorlikni rivojlantirish uchun 309 milliard so‘m kredit ajratilgan bo‘lsa-da, tuman rahbariyati aholiga birorta ham tayyor loyiha taklif qilmagan. Prezident yig‘ilishda Uzun tumani tajribasini namuna sifatida keltirdi.
Ushbu tumanda rahbariyat 70 million dollar xorijiy investitsiya jalb qilishga erishgan. Bu misol ishsizlikka qarshi kurashda samarali yondashuv zarurligini ko‘rsatadi.
