Nogironligi bo‘lgan shaxslar uchun yangi qo‘llab-quvvatlash tizimi
Prezident Shavkat Mirziyoyev ijtimoiy himoya tizimiga oid yangi qarorni e’lon qildi. Bu haqda Zamin.uz xabar berdi.
Unga ko‘ra, daromad topish imkoniyati cheklangan va nogironligi bo‘lgan shaxslar endilikda kambag‘allar reestriga kiritilmaydi. Chunki bunday fuqarolarni qo‘llab-quvvatlash mas’uliyati to‘liq davlat zimmasiga o‘tkaziladi.
Bu qaror ijtimoiy himoya tizimida yangi davrni boshlab beradi. Yig‘ilishda “Teng imkon – inklyuziv bandlik” loyihasi haqida ham ma’lumot berildi.
Ushbu loyiha yangi yildan amaliyotga tatbiq etiladi va nogironligi bo‘lgan 40 ming kishini ish bilan ta’minlash asosiy vazifa sifatida belgilandi. Bu maqsadga erishish uchun Bandlik jamg‘armasi orqali 30 million so‘mgacha foizsiz ssuda ajratilishi nazarda tutilgan.
Kambag‘allik xavfi bor oilalar uchun mavjud yordam va imtiyozlar saqlanib qoladi. Xususan, ularga 6 oy davomida moddiy yordam, bolalar nafaqasi, bog‘cha va to‘garak xarajatlarini qoplash imkoniyati taqdim etiladi.
Shuningdek, 12 oy davomida 110 turdagi ijtimoiy xizmatlardan foydalanish huquqi beriladi. Bundan tashqari, og‘ir hayotiy vaziyatga tushib qolish xavfi bor oilalarni oldindan aniqlash va ularga manzilli yordam ko‘rsatish tizimi yo‘lga qo‘yiladi.
Ushbu vazifalarni amalga oshirish va nazorat qilish mas’uliyati Ijtimoiy himoya milliy agentligi direktorining birinchi o‘rinbosari Shahnoza Mirziyoyevaga yuklatildi. Ushbu qaror kelgusi yilda aholini ijtimoiy himoya qilish siyosati yanada kuchayishini ko‘rsatadi (manba: one.uz).
