Toshkent va Nyu-York shaharlari o‘rtasida hamkorlik aloqalarini yo‘lga qo‘yish rejalashtirilmoqda. Bu haqda Zamin.uz xabar berdi.
Bu haqda Toshkent shahar hokimligi matbuot xizmati ma’lum qildi. Ushbu tashabbus Nyu-York meri Erik Adams va Toshkent hokimi Shavkat Umurzoqov o‘rtasida bo‘lib o‘tgan uchrashuv chog‘ida muhokama qilingan.
Uchrashuv davomida har ikki shahar rahbarlari yirik megapolislardagi rivojlanish jarayonlari, dolzarb masalalar va istiqbolli yo‘nalishlar haqida fikr almashdilar. Toshkent hokimi Shavkat Umurzoqov amerikalik hamkasbiga "Toshkentni 2030 yilgacha rivojlantirish strategiyasi"ning asosiy yo‘nalishlari va maqsadlarini taqdim etdi.
Tomonlar transport, logistika va kommunal xizmatlar sohasidagi islohotlarni batafsil muhokama qilib, bu yo‘nalishlarda tajriba almashish imkoniyatlarini ko‘rib chiqdilar. Shuningdek, xalqaro kompaniyalar bilan amalga oshirilayotgan loyihalar haqida ma’lumot berildi va ularning Toshkent shahridagi ahamiyati ta’kidlandi.
Mazkur kelishuv ikki shahar o‘rtasida uzoq muddatli hamkorlikni rivojlantirishga qaratilgan bo‘lib, bu nafaqat iqtisodiy, balki ijtimoiy sohalarda ham ijobiy o‘zgarishlarga zamin yaratishi kutilmoqda. Manba: Toshkent shahar hokimligi matbuot xizmati.
