Sog‘liqni saqlash xizmatlari hajmi 14,6 trln so‘mga yetdi
Milliy statistika qo‘mitasi 2025-yilning yanvar-sentyabr oylarida sog‘liqni saqlash sohasida ko‘rsatilgan xizmatlar hajmi bo‘yicha ma’lumotlarni e’lon qildi. Bu haqda Zamin.uz xabar berdi.
Unga ko‘ra, ushbu davrda sog‘liqni saqlash xizmatlari hajmi 14,6 trillion so‘mni tashkil etgan. Bu ko‘rsatkich o‘tgan yilga nisbatan 13,6 foizga o‘sgan.
Hududlar bo‘yicha ko‘rsatkichlarga nazar tashlaydigan bo‘lsak, eng ko‘p mablag‘ Toshkent shahrida sarflangan — 6,7 trillion so‘m. Bu umumiy hajmning deyarli yarmiga teng.
Keyingi o‘rinlarda Toshkent viloyati (1,4 trillion so‘m) va Samarqand viloyati (1,1 trillion so‘m) qayd etilgan. Boshqa hududlardagi sog‘liqni saqlash xizmatlari hajmi quyidagicha: Farg‘ona viloyati — 961,8 milliard so‘m, Namangan — 664,1 milliard so‘m, Andijon — 652,4 milliard so‘m, Buxoro — 569,2 milliard so‘m, Qashqadaryo — 545,4 milliard so‘m, Xorazm — 495,4 milliard so‘m.
Shuningdek, Surxondaryo viloyatida 373,8 milliard so‘m, Jizzaxda 358 milliard so‘m, Sirdaryoda 259,2 milliard so‘m, Qoraqalpog‘istonda 253 milliard so‘m va Navoiy viloyatida 238,4 milliard so‘m sarflangan. Ushbu raqamlar aholining sog‘liqni saqlash xizmatlariga bo‘lgan ehtiyoji, tibbiy infratuzilma darajasi va hududiy rivojlanish darajasi bilan bog‘liq.
Toshkent shahri va boshqa viloyatlar o‘rtasidagi tafovut esa sog‘liqni saqlash xizmatlarining markazlashganligini ko‘rsatadi. Ma’lumot manbasi: Milliy statistika qo‘mitasi.
