O‘zbekistondan mehnat migratsiyasi 4 foizga oshdi
2025 yilning yanvar–sentabr oylarida O‘zbekistondan 2,36 million nafar fuqaro mehnat migratsiyasi yo‘li bilan boshqa davlatlarga chiqib ketdi. Bu haqda Zamin.uz xabar berdi.
Bu ko‘rsatkich 2024 yilning shu davriga nisbatan 4 foizga oshgan. Ushbu ma'lumotni O‘zbekiston Markaziy banki To‘lov balansi departamenti direktor o‘rinbosari Azizbek Hayitov IFAD va Markaziy bank tomonidan tashkil etilgan pul o‘tkazmalari bo‘yicha konferensiyada e'lon qildi.
Migratsiya oqimining asosiy qismi, ya'ni 92 foizi (2,2 million kishi), uchta asosiy davlat hissasiga to‘g‘ri keladi. Ushbu davlatlar O‘zbekiston fuqarolari uchun vaqtinchalik ish bilan ta'minlanishning asosiy yo‘nalishlari hisoblanadi.
Shu bilan birga, mehnat migratsiyasi yo‘nalishlari asta-sekin diversifikatsiya qilinayotganini ham kuzatish mumkin. Ayrim davlatlarda mehnat migrantlari sonining sezilarli darajada oshishi qayd etilgan.
Bu esa Germaniya, Quvayt, Fransiya, Janubiy Koreya, Italiya, Buyuk Britaniya, Yaponiya va Shvetsiya kabi davlatlar bilan hukumatlararo ishga joylashish bo‘yicha kanallarning kengayishi bilan izohlanmoqda. Mutaxassislar mehnat migrantlarining oilaviy moliyaviy barqarorligini oshirish va pul o‘tkazmalarining xarajatlarini kamaytirish bo‘yicha tavsiyalarni taqdim etdilar.
Jumladan, pul o‘tkazmalarini kreditga layoqatlilikni baholashda muqobil daromad manbai sifatida qo‘llash taklif qilindi. Shuningdek, IFAD va Markaziy bankning qo‘shma dasturlari moliyaviy savodxonlikni oshirish, xarajatlarni rejalashtirish hamda jamg‘arma ko‘nikmalarini rivojlantirishga qaratilgan.
Mehnat migratsiyasining o‘sishi mamlakat iqtisodiyotida muhim rol o‘ynayotgan pul o‘tkazmalari hajmini oshirmoqda. 2025 yilning yanvar–oktabr oylarida O‘zbekistonga kelib tushgan pul o‘tkazmalari hajmi 15,8 milliard AQSh dollariga yetgan bo‘lib, bu o‘tgan yilga nisbatan 25 foizga ko‘p.
Umuman olganda, 2025 yil oxiriga borib, global pul o‘tkazmalari hajmi 913 milliard AQSh dollariga yetishi kutilmoqda. (Manba: zamin.uz)
