Uy-joy bozorini rivojlantirish uchun qo‘mita tuzildi

O‘zbekiston Prezidenti Shavkat Mirziyoyev uy-joy va ipoteka bozorini barqaror rivojlantirishga qaratilgan qarorni imzoladi. Bu haqda Zamin.uz xabar berdi.

Ushbu qaror asosida Milliy qo‘mita tashkil etiladi. Qo‘mitaning asosiy vazifalaridan biri urbanizatsiya jarayonlarini rivojlantirish va uy-joy sohasida davlat boshqaruvi samaradorligini oshirishdan iborat.

Bundan tashqari, uy-joy qurilishi va sohaga oid normativ-huquqiy hujjatlar loyihalari qo‘mita bilan majburiy kelishilishi talab etiladi. Mazkur choralar davlat yordami asosida Toshkent shahri va viloyatlar markazlarida turli loyihalarni amalga oshirishni o‘z ichiga oladi.

Jumladan, ko‘p qavatli uylar, xususan, “Yangi O‘zbekiston” massivlari uchun yillik qurilish rejalari ishlab chiqiladi va tasdiqlanadi. Ushbu vazifalarni bajarishda qo‘mitada 50 nafar xodim faoliyat olib boradi.

Qo‘mita ichki va xalqaro mutaxassislarni to‘g‘ridan-to‘g‘ri shartnomalar asosida ishga jalb qilish huquqiga ega. Tashkilot faoliyati uchun javobgarlik qo‘mita raisiga yuklatilgan bo‘lib, umumiy nazorat va muvofiqlashtirishni O‘zbekiston Bosh vaziri Abdulla Aripov amalga oshiradi.

Manba: zamin.uz