Urbanizatsiya uchun Milliy qo‘mita tashkil etildi
O‘zbekiston Prezidenti Shavkat Mirziyoyev urbanizatsiya va uy-joy bozorini barqaror rivojlantirish maqsadida Milliy qo‘mita tashkil etish haqida qaror imzoladi. Bu haqda Zamin.uz xabar berdi.
Ushbu yangi tashkilot shaharsozlik va uy-joy qurilishi sohasidagi siyosatni muvofiqlashtirish vazifasini bajaradi. Qo‘mita Toshkent, Nukus va viloyat markazlarida yangi turar-joy va noturar bino majmualarini barpo etish loyihalarini amalga oshirishda ishtirok etadi.
Shuningdek, "Yangi O‘zbekiston" massivlarida ko‘p qavatli uylar qurish bo‘yicha hujjatlarni ishlab chiqish va tasdiqlash jarayonlarini ham boshqaradi. Qo‘mitada 50 nafar xodim ishlaydi va zaruratga ko‘ra, mahalliy hamda xorijiy mutaxassislar jalb qilinishi mumkin.
Tashkilotning moliyaviy ta’minoti davlat byudjeti hisobidan amalga oshiriladi. Qo‘mita Toshkent shahrida, Zulfiya xonim ko‘chasi, 1a manzilida joylashgan.
Qarorning ijrosi ustidan nazoratni Bosh vazir Abdulla Aripov amalga oshiradi.
