Toshkent havosi ifloslanishi bo‘yicha dunyoda 2-o‘rinda
20-noyabr kuni Toshkent shahri havo ifloslanishi bo‘yicha dunyodagi yirik shaharlar orasida yuqori o‘rinlardan birini egalladi. Bu haqda Zamin.uz xabar berdi.
IQAir xalqaro portali ma’lumotlariga ko‘ra, poytaxtimiz dunyo megapolislari ichida ikkinchi o‘rinni qayd etdi. Ushbu holat havodagi zararli zarralar miqdori juda yuqori ekani va bu aholi salomatligi uchun jiddiy xavf tug‘dirayotganini ko‘rsatadi.
Toshkent vaqti bilan soat 18:55 da o‘lchangan ma’lumotlarga ko‘ra, havodagi PM 2,5 turdagi mayda zarrachalar konsentratsiyasi 166 mkg/m³ ni tashkil etdi. Bu ko‘rsatkich Jahon sog‘liqni saqlash tashkiloti tavsiya qilgan me’yordan 33,2 baravar yuqori bo‘lib, vaziyatning qanchalik jiddiy ekanini yana bir bor tasdiqlaydi.
Mutaxassislar aholiga ehtiyot choralarini kuchaytirishni tavsiya qilmoqda. Zarur bo‘lmasa, ko‘chaga chiqmaslik, ayniqsa, nafas yo‘llari kasalliklari bilan og‘rigan insonlar tibbiy niqob taqishi muhim.
Uyga kirganda yuz va qo‘llarni yaxshilab yuvish, xonalarni changdan tozalash, eshik va derazalarni yopib qo‘yish ham havo ifloslanishidan himoyalanishda yordam beradi. Shuningdek, xona ichini nam latta bilan tozalashni odat qilish kerak.
O‘zgidromet ham avvalroq Toshkent havosi ifloslanishi bo‘yicha ogohlantirish bergan edi. Mutaxassislarning fikricha, bu holat keskin harorat o‘zgarishlari sabab yuzaga kelgan inversiya bilan bog‘liq.
Inversiya sharoitida zararli moddalar yerga yaqin havo qatlamida to‘planib qoladi va tarqalishi qiyinlashadi. Mazkur vaziyat Toshkent aholisi uchun ekologik xavfsizlik va shaxsiy ehtiyot choralarining muhimligini yana bir bor eslatib o‘tdi.
Manba: IQAir xalqaro portali.
