Yoshlar bandligi va kitobxonlik targ‘iboti kuchaytiriladi
O‘zbekistonda “Yoshlar daftari”ga kiritilgan 16 ming nafar yigit-qizning bandligini ta’minlash bo‘yicha chora-tadbirlar amalga oshiriladi. Bu haqda Zamin.uz xabar berdi.
Bu haqida Prezident Shavkat Mirziyoyev tomonidan qabul qilingan qarorda ma’lumot berilgan. Shuningdek, “Kitobxonlik” loyihasi doirasida yoshlar orasida ilmiy-ommabop va badiiy kitoblarni o‘qish ko‘lamini kengaytirish rejalashtirilmoqda.
Maqsad – kitob o‘qiydigan yoshlar ulushini 10 foizga oshirish. 2024-yil fevral oyidan boshlab kam ta’minlangan oilalar ro‘yxatiga kiritilgan yoshlarga ijtimoiy yordam ko‘rsatish yo‘lga qo‘yiladi.
Bu yordam shartnoma asosida taqdim etilib, yoshlar bir qator talablarni bajarishi zarur bo‘ladi. Yordam oluvchilar uzluksiz o‘qishi, yaxshi o‘zlashtirishi va “Besh tashabbus olimpiadasi”da faol ishtirok etishi shart.
Agar belgilangan talablar bajarilmasa, yordam miqdori 30 foizgacha kamaytirilishi yoki muddatli ravishda to‘xtatilishi mumkin. Bu muddat bir oy, bir yil yoki undan ham uzun bo‘lishi mumkin.
Shartnoma shartlarini bir yil davomida bajarib kelgan yoshlar esa ijtimoiy yordamni navbatsiz va imtiyozli shartlarda olish huquqiga ega bo‘ladi. Shu bilan birga, ming nafar faol yoshlar pul mukofoti bilan taqdirlanishi rejalashtirilgan.
Bu kabi tashabbuslar yoshlarning rivojlanishi va jamiyatda faol ishtirok etishini rag‘batlantirishga qaratilgan. Manba: One.uz.
