Dafn jarayonlari raqamlashtiriladi: yangi tizim joriy etiladi
O‘zbekiston hukumati tomonidan dafn etish jarayonlarini takomillashtirishga qaratilgan yangi qaror qabul qilindi. Bu haqda Zamin.uz xabar berdi.
Mazkur qarorga ko‘ra, mamlakatda dafn ishlari bosqichma-bosqich raqamlashtiriladi. Ushbu o‘zgarishlar sohada shaffoflikni ta’minlash va nazoratni kuchaytirishga qaratilgan.
Qaror asosida vafot etgan shaxsni dafn etishga ruxsat berish, ushbu jarayonni ro‘yxatga olish va monitoring qilish maxsus elektron axborot tizimi orqali amalga oshiriladi. Bu tizim hujjatlarni rasmiylashtirishni tezlashtiradi, inson omilini kamaytiradi va barcha ma’lumotlarni yagona bazada jamlaydi.
Shu bilan birga, 2026 yil 1 iyunga qadar “FHDYO yagona elektron arxivi” tizimida maxsus modul — “Dafn etish ishlarini ro‘yxatga olish yagona elektron daftari” ishlab chiqilishi rejalashtirilgan. Ushbu modul yordamida qabristonlar, ruxsatnomalar va boshqa barcha ma’lumotlar elektron shaklda yuritiladi.
Modulning mobil ilovasi ham ishlab chiqilishi ko‘zda tutilgan. Shuningdek, 2026 yil 1 martdan boshlab, vafot etgan shaxsning o‘limi qayd etilganidan so‘ng uning yaqinlariga My.gov.uz shaxsiy kabinetlari orqali avtomatik ravishda QR-kodli ma’lumotnoma yuboriladi.
Ushbu ma’lumotnoma rasmiy hujjat maqomiga ega bo‘lib, qog‘oz shaklidagi qo‘shimcha ishlarni kamaytiradi. 2026 yil 1 iyuldan 31 dekabrgacha Toshkent shahrida yangi tizim tajriba tariqasida joriy etiladi.
Ushbu davrda qabriston mudirlari dafn ishlariga ruxsatni faqat elektron tizim yoki mobil ilova orqali beradilar. Qog‘oz shaklidagi ro‘yxatga olish amaliyoti to‘liq bekor qilinadi.
Hukumatning ushbu qarori sohada tartib-intizomni kuchaytirish, korrupsiya xavfini kamaytirish va xizmatlarni shaffoflashtirishni maqsad qilgan. Elektron tizim joriy etilishi orqali aholi uchun qulaylik yaratiladi, zarur ma’lumotlarni tezkor olish va davlat xizmatlarini avtomatlashtirish imkoniyati oshadi.
Yangi tizimning to‘liq joriy etilishi bilan O‘zbekiston bo‘ylab yagona standart va zamonaviy nazorat tizimi shakllanishi kutilmoqda. Manba: Zamin.uz.
