O‘zbekiston Respublikasi Gidrometeorologiya xizmati markazi (O‘zgidromet) mamlakat hududi bo‘yicha 2023-2024-yilgi qish mavsumiga dastlabki ob-havo prognozini e’lon qildi. Bu haqda Zamin.uz xabar berdi.
Unga ko‘ra, kelayotgan qish mavsumida havo harorati va yog‘ingarchilik miqdori bo‘yicha ayrim o‘zgarishlar kuzatilishi kutilmoqda. Dekabr oyida harorat odatdagidan biroz yuqori bo‘ladi.
O‘rtacha harorat me’yordan 1–1,5 darajaga yuqoriroq bo‘lishi prognoz qilingan. Oy boshida havo iliq bo‘lib, kechalari 0...+5 daraja, kunduzi esa +10...+15 daraja atrofida bo‘lishi kutilmoqda.
Oy oxirida esa harorat keskin o‘zgarishi mumkin: kechalari +2...+7 darajadan 0...–5 darajagacha, kunduzi esa +12...+17 darajadan +2...+7 darajagacha tushishi mumkin. Yog‘ingarchilik miqdori esa me’yorga yaqin yoki undan ozroq bo‘lishi ehtimol qilinmoqda.
Yanvar oyining harorati ko‘p yillik ko‘rsatkichlarga yaqin bo‘lsa-da, ayrim hududlarda sovuqroq bo‘lishi mumkin. Oy davomida harorat sezilarli o‘zgarib turadi.
Oy boshida kechalari harorat +3...+8 daraja, kunduzi +10...+15 daraja atrofida bo‘lsa, oxiriga kelib kechalari –12...–17 darajagacha, kunduzi esa –5...–10 darajagacha pasayishi kutilmoqda. Nukus va Urganchda sovuq harorat –20...–25 darajagacha yetishi mumkin.
Fevral oyida qish sovuqligi davom etadi. Oy boshida kechalari harorat –5...–10 daraja, kunduzi esa –3...+2 daraja atrofida bo‘lishi kutilmoqda.
Oy oxiriga kelib esa havo isib, kechalari harorat +3...+8 daraja, kunduzi esa +10...+15 darajagacha ko‘tarilishi mumkin. Janubiy hududlarda esa kunduzi harorat +20 darajagacha yetishi ehtimoli bor.
Fevral oyida yog‘ingarchilik miqdori me’yorga yaqin bo‘lishi prognoz qilinmoqda. Manba: O‘zgidromet prognozlari.
