2025–2026-yillar qish ob-havo prognozi e’lon qilindi
O‘zbekiston Gidrometeorologiya xizmati 2025–2026-yillar qish mavsumi bo‘yicha dastlabki ob-havo bashoratini e’lon qildi. Bu haqda Zamin.uz xabar berdi.
Mutaxassislarning ta’kidlashicha, bu yilgi qish umumiy holatda ko‘p yillik me’yorlarga yaqin bo‘ladi, ammo ayrim kunlarda haroratning sezilarli o‘zgarishi kuzatilishi mumkin. Shu bois fuqarolar va iqtisodiy tarmoqlar oldindan tayyorgarlik ko‘rishlari tavsiya etiladi.
**Dekabr** oyida havo nisbatan iliq va o‘zgaruvchan bo‘lishi kutilmoqda. Oyning boshida harorat tunlari 0…+5°, kunduzlari esa +10…+15° atrofida bo‘ladi.
Ammo ikkinchi yarmidan boshlab havo keskin o‘zgarib, tunlari +2…+7° dan 0…–5° gacha, kunduzlari esa +12…+17° dan +2…+7° gacha pasayishi mumkin. Yog‘ingarchilik me’yor darajasida yoki undan bir oz kam bo‘lishi taxmin qilinmoqda.
**Yanvar** oyida sovuqlar asta-sekin kuchayadi. Oy boshida harorat tunlari +3…+8° dan –3…–8° gacha, kunduzlari esa +10…+15° dan –2…+3° gacha o‘zgarib turadi.
Uchinchi o‘n kunlikda qishning eng sovuq davri boshlanib, ko‘pchilik hududlarda tunlari –12…–17°, kunduzlari –5…–10° gacha tushishi mumkin. Nukus va Urganch kabi hududlarda esa harorat –20…–25° darajagacha pasayishi ehtimoli bor.
**Fevral** oyining boshida anomal sovuq davom etishi kutilmoqda. Tunlari harorat –5…–10°, kunduzlari –3…+2° atrofida bo‘ladi.
Oyning ikkinchi yarmida havo ilib, tunlari –2…–7° gacha, kunduzlari esa +10…+15° gacha ko‘tarilishi mumkin. Janubiy hududlarda ayrim kunlarda harorat +15…+20° ga yetishi ehtimoldan xoli emas.
Yog‘ingarchilik miqdori umumiy hisobda me’yor doirasida bo‘ladi. Mutaxassislar mavsumiy prognozlarning aniq yo‘llanma emasligini, ob-havo sharoitiga ko‘ra o‘zgarishlar bo‘lishi mumkinligini eslatmoqda.
Kuchli sovuqlar, shamollar va boshqa noqulay sharoitlar yuzaga kelganda qo‘shimcha axborotlar berib boriladi. Shu bois fuqarolar va iqtisodiy sohalar, jumladan, issiqlik ta’minoti, qishloq xo‘jaligi, energetika hamda transport tizimi vakillari oldindan ehtiyotkorlik choralarini ko‘rishlari tavsiya etiladi.
Ma’lumot manbasi: Gidrometeorologiya xizmati.
