O‘zbekistonda o‘lim guvohnomalari raqamlashtiriladi
O‘zbekistonda o‘lim haqidagi guvohnomalarni ro‘yxatga olish jarayoni raqamlashtiriladi. Bu haqda Zamin.uz xabar berdi.
Adliya vazirligi bergan ma’lumotga ko‘ra, 2026 yil 1 martdan boshlab o‘lim haqidagi guvohnomalar elektron shaklda rasmiylashtiriladi va ularga QR-kod biriktiriladi. Mazkur hujjatlar avtomatik ravishda my.gov.uz portali orqali marhumning yaqin qarindoshlari, ya’ni turmush o‘rtog‘i, ota-onasi yoki farzandlarining shaxsiy kabinetiga yuboriladi.
Bu esa qog‘oz shaklidagi guvohnomalarni butunlay almashtiradi. Shuningdek, 2026 yil 1 iyunga qadar «Dafn bilan bog‘liq xizmatlarning yagona elektron reyestri» moduli ishga tushiriladi, bu tizim mobil ilovadan foydalanish imkonini ham beradi.
Mazkur platforma orqali dafn uchun barcha ruxsatnomalarni rasmiylashtirish yo‘lga qo‘yiladi. Toshkent shahrida esa 2026 yil 1 iyuldan 31 dekabrga qadar qog‘oz shaklidagi qabriston hisobini yuritish tajriba tariqasida bekor qilinadi.
Shu davrdan boshlab dafn ruxsatnomalari faqat raqamli shaklda beriladi. Bu yangiliklar aholiga qulaylik yaratish va xizmatlarni yanada soddalashtirishga qaratilgan.
