Toshkentda har bir tumanda ekologik laboratoriyalar ishga tushdi
Toshkent shahrida atmosfera havosining holatini yanada aniq kuzatish va ifloslanish manbalarini o‘z vaqtida aniqlash maqsadida barcha tumanlarda maxsus mobil ekologik laboratoriyalar ishga tushirildi. Bu haqda Zamin.uz xabar berdi.
Bu haqda Ekologiya va iqlim o‘zgarishi milliy qo‘mitasi ma’lumot berdi. Qo‘mitaning xabariga ko‘ra, poytaxtning har bir tumanida 24 soat davomida kuchaytirilgan tartibda monitoring olib boriladi.
Mazkur laboratoriyalar Atrof-muhitni muhofaza qilish sohasida ixtisoslashgan analitik nazorat markazi tomonidan jihozlangan. Ular havo tarkibini real vaqt rejimida tahlil qilish imkoniyatiga ega.
Hozirda shunday laboratoriyalardan biri Yunusobod tumanidagi “Turkiston” metro bekati yaqinida faoliyat yuritmoqda. Ushbu laboratoriya havodagi zararli moddalar miqdorini aniqlab, ifloslanish manbalari haqida tezkor ma’lumot taqdim etmoqda.
Shuningdek, poytaxtdagi ekologik holatni yaxshilash maqsadida maxsus shtab tashkil etilgani ma’lum qilindi. Tegishli idoralar bilan birgalikda zarar manbalari aniqlanib, ularni bartaraf etish bo‘yicha zarur choralar amalga oshirilmoqda.
Eslatib o‘tamiz, havo sifatini yaxshilash bo‘yicha olib borilayotgan ishlar doirasida Yakkasaroy tumanida joylashgan Toshkent issiqlik elektr markazida mazutdan foydalanish to‘xtatilgani avval xabar qilingan edi (manba: zamin.uz).
