O‘zbekistonda ekologik muammolar uchun yangi jamg‘arma tashkil etildi
O‘zbekistonda ekologik muammolarni tizimli hal etish maqsadida yangi Umummilliy ekologik muammolarni bartaraf etish davlat maqsadli jamg‘armasi tashkil etildi. Bu haqda Zamin.uz xabar berdi.
Ushbu tashabbus mamlakatning ekologik barqarorlikka intilishini va bu sohaning davlat siyosatida muhim o‘rin tutishini yana bir bor tasdiqlaydi. 2025 yilda jamg‘arma uchun davlat byudjetidan 900 milliard so‘m ajratilishi rejalashtirilgan.
Ushbu mablag‘lar atrof-muhitni yaxshilash, hududlarni rivojlantirish va boshqa ekologik maqsadlarga yo‘naltiriladi. Markaziy bank raisi Timur Ishmetovning so‘zlariga ko‘ra, milliy valyutaning mustahkamlanishi natijasida davlat qarzi bo‘yicha 1,3 trillion so‘m iqtisod qilingan, bu tejamning bir qismi ekologik loyihalar uchun sarflanadi.
2026 yilda jamg‘arma doirasidagi loyihalar uchun 548 milliard so‘m ajratilishi belgilangan. Ushbu mablag‘larning bir qismi “Yashil makon” loyihasiga, shahar va tumanlarda sanitar tozalash ishlariga, cho‘llanish va shamol eroziyasiga qarshi himoya o‘rmonlari barpo etishga, shuningdek, zamonaviy o‘rmon texnikalarini xarid qilishga sarflanadi.
Bundan tashqari, tabiiy hududlar va hayvonot dunyosini kadastr qilish ishlari ham rejalashtirilgan. 2026 yildan jamg‘arma daromad manbalari kengaytiriladi.
Uglerod birliklari savdosi, chiqindilarni joylashtirish bo‘yicha yig‘imlar va kompensatsiyalar, shuningdek, import transport vositalari uchun to‘lanadigan utilizatsiya yig‘imlari jamg‘arma mablag‘larini shakllantirishda muhim rol o‘ynaydi. 2027 yildan esa avtotransport va shina mahsulotlari uchun yig‘imlarning katta qismi jamg‘arma hisobiga o‘tkaziladi.
Jamg‘arma faoliyati shaffoflik va jamoatchilik nazorati ostida amalga oshiriladi. Boshqaruv kengashi tarkibida mustaqil jamoatchilik vakillari ham bo‘ladi.
Ularning vazifasi mablag‘larning manzilli va oqilona sarflanishini ta’minlashdir. Ushbu yondashuv mamlakatda ekologik muammolarni hal etishda yangi bosqichni boshlab beradi va atrof-muhitni muhofaza qilishga sezilarli hissa qo‘shishi kutilmoqda (manba: zamin.uz).
