Toshkent shahrida havo sifati yomonlashgani sababli, bu masala bo‘yicha xavotirlar ortib bormoqda. Bu haqda Zamin.uz xabar berdi.
Mutaxassislar ifloslanishning asosiy manbalaridan biri avtotransport vositalari ekanini ta’kidlamoqda. Ekologiya va iqlim o‘zgarishi milliy qo‘mitasi rahbari Aziz Abduhakimovning so‘zlariga ko‘ra, ayniqsa AI-80 markali benzinning zararli ta’siri katta bo‘lgani aniqlangan.
Shu sababdan, ushbu yonilg‘ining sotilishi va mamlakatga olib kirilishi 1 dekabrdan boshlab to‘liq taqiqlanadi. Bu haqda qumita.uz xabar berdi.
Aziz Abduhakimovning ma’lumotlariga ko‘ra, AI-80 markali benzin arzonligi sababli ko‘p yillardan beri keng qo‘llanib kelgan va ayniqsa Toshkent shahridagi havoning ifloslanishiga sezilarli ta’sir ko‘rsatgan. Ushbu qaror poytaxtdagi ekologik holatni yaxshilashga yordam beradi, deb kutilmoqda.
Mutaxassislarning ta’kidlashicha, Toshkentda avtomobillar soni so‘nggi yillarda keskin oshgan. Hozirda shahardagi ko‘chalarda kuniga bir millionga yaqin transport vositasi harakatlanadi.
Shularning 650 mingtasi Toshkentda ro‘yxatga olingan bo‘lsa, 300–350 mingta avtomobil viloyatlardan kirib keladi. Qiyoslash uchun, besh yil avval bu ko‘rsatkich deyarli ikki baravar kam edi.
Shuningdek, transport oqimini tartibga solish va havo sifatini yaxshilash maqsadida joriy qilingan yashil, sariq va qizil stiker tizimi ham o‘z samarasini berishi mumkinligi qayd etildi. Aziz Abduhakimovning aytishicha, boshqa davlatlarning tajribasi shuni ko‘rsatadiki, bunday usullar orqali eski va ekologiyaga zarar yetkazuvchi avtomobillar asta-sekin muomaladan chiqariladi.
Mutasaddilarning fikricha, bu kabi chora-tadbirlar Toshkent havosini tozalash va ekologik muammolarni kamaytirishga qaratilgan muhim qadam hisoblanadi.
