Toshkent-Chorvoq yo‘li: masofa qisqaradi, qulaylik oshadi
Toshkentdan Chorvoq dam olish maskaniga olib boradigan yangi pulli avtomobil yo‘li qurilishi rejalashtirilmoqda. Bu haqda Zamin.uz xabar berdi.
Ushbu yo‘l uzunligi 56 kilometr bo‘lib, hozirgi 82 kilometrlik masofaga nisbatan ancha qisqa va qulay bo‘lishi kutilmoqda. Bu haqda Transport vazirligi vakili Jasurbek Choriyev ma’lumot berdi.
Chorvoq va Chimyon dam olish maskanlari yil davomida sayyohlar uchun jozibador hudud hisoblanadi. Shu sababli, Transport vazirligi tashrif buyuruvchilarga manzilga qulay va tez yetib borish imkoniyatini yaratish maqsadida yangi infratuzilmani rivojlantirishga e’tibor qaratmoqda.
Ayniqsa, mavsumiy tirbandliklar tufayli yuzaga keladigan noqulayliklarni bartaraf etish uchun muqobil yo‘l loyihasi ishlab chiqilmoqda. Hozirda mavjud trassa bo‘ylab bir kunda o‘rtacha 5 ming avtomobil harakatlanadi, yuqori mavsumda esa bu ko‘rsatkich 10 baravargacha oshishi mumkin.
Shu boisdan yangi yo‘l loyihasi umumiy muhokamaga taqdim etilgan va uning konsepsiyasi ishlab chiqilmoqda. Loyihaning texnik-iqtisodiy asosi 2026-yil o‘rtalarigacha tayyor bo‘lishi rejalashtirilgan.
Shundan so‘ng tender natijalari asosida qurilishi boshlanadi. Yangi yo‘l 1A toifali, sement-beton qoplamali va 6 qatorli qilib quriladi.
Trassada maksimal ruxsat etilgan tezlik 150 km/soatni tashkil etadi. Yillik transport oqimi esa 250 ming avtomobilga yetishi taxmin qilinmoqda.
Ushbu yo‘l nafaqat masofani qisqartiradi, balki Chorvoq hududini poytaxt aholisi va mehmonlari uchun yanada qulay qiladi. Qurilish ishlari davlat-xususiy sherikchilik asosida olib boriladi va mavjud yo‘llarga zarar yetkazmaslikka alohida e’tibor qaratiladi.
Bu loyiha nafaqat transport tizimini yaxshilash, balki sayyohlik hududlarini rivojlantirishga ham xizmat qilishi kutilmoqda.
