O‘zbekistonda havo sifati noyabr oxirigacha o‘zgarmaydi
O‘zbekistonning yirik shaharlarida havo sifati yaqin kunlarda yaxshilanmasligi mumkin. Bu haqda Zamin.uz xabar berdi.
“O‘zgidromet” bergan ma’lumotlarga ko‘ra, inversiya jarayoni davom etayotgani sababli havo ifloslanish darajasi noyabr oyining oxiriga qadar o‘zgarishi kutilmayapti. Mutaxassislarning ta’kidlashicha, havo muammolarining asosiy sabablari harorat inversiyasi, yog‘ingarchilikning yo‘qligi va qurg‘oqchilik bilan bog‘liq.
Havo qatlamlarining aralashmasligi natijasida PM2.5 kabi zararli mayda zarrachalar atmosferada to‘planib qolmoqda. Masalan, 23-noyabr kuni Toshkentda PM2.5 ko‘rsatkichi belgilangan me’yordan uch barobar yuqori bo‘lgani qayd etilgan.
Mutasaddilar bu holat mavsumiy ekanini, havo sifati faqat kuchli shamol, havo massalarining almashishi yoki yog‘ingarchilikdan so‘ng yaxshilanishi mumkinligini ma’lum qilishdi. Shu bilan birga, hozirgi kunlarda havo sifati qisqa vaqt ichida ham o‘zgarishi va ba’zi paytlarda xavfli darajaga yetishi ehtimoli borligi qayd etildi.
Aholiga ehtiyot choralarini ko‘rish tavsiya etilmoqda. Xususan, ochiq havoda iloji boricha kamroq bo‘lish, tashqi faoliyatni cheklash va tashqariga chiqqanda niqob taqishni unutmang.
