O‘zbekistonda gaz qazib olish kamaydi, eksport oshdi
O‘zbekistonda tabiiy gaz qazib chiqarish hajmi pasaygan bo‘lsa-da, uning eksport hajmi oshgani qayd etildi. Bu haqda Zamin.uz xabar berdi.
Milliy statistika qo‘mitasining ma’lumotlariga ko‘ra, 2025 yilning dastlabki o‘n oyida gaz eksporti 568,2 million dollarga yetib, o‘tgan yilga nisbatan 5,1 foizga o‘sgan. Xitoy bojxona ma’lumotlariga asoslanib, O‘zbekiston yanvar-oktabr oylarida umumiy qiymati 695,58 million dollarga teng bo‘lgan xomashyo eksport qilgani ma’lum bo‘ldi.
Shu bilan birga, mamlakatda tabiiy gaz qazib olish hajmi yillik hisobda 5,3 foizga kamayib, 35,5 milliard kubometrni tashkil etdi. Gaz kondensati ishlab chiqarish ham pasayib, 1 million tonnadan 930,9 ming tonnagacha tushdi.
Shuningdek, Milliy statistika qo‘mitasi hisobotida noyabr oyining boshiga kelib, gaz importi hajmi 1,1 milliard dollarga tushgani qayd etilgan. Qolaversa, Qozog‘iston Rossiyadan O‘zbekistonga gaz tranziti hajmini oshirishga tayyor ekanini ma’lum qildi.
Yil oxirigacha Rossiyadan O‘zbekistonga 6 milliard kubometr gaz tranziti amalga oshirilishi kutilmoqda. Manba: zamin.uz
