O‘zbekistonning kredit reytingi "BB" darajasiga ko‘tarildi

So‘nggi yetti yil ichida birinchi marta S&P xalqaro reyting agentligi O‘zbekistonning suveren kredit reytingini "BB-" darajasidan "BB" darajasiga oshirdi. Bu haqda Zamin.uz xabar berdi.

Ushbu reytingning prognozi "barqaror" deb baholandi. Agentlikning ta’kidlashicha, oxirgi yillarda mamlakat iqtisodiyotida olib borilgan siyosat izchil mustahkamlanib bormoqda.

Xususan, energetika sohasida amalga oshirilgan islohotlar, tariflar tizimidagi o‘zgarishlar va oshkoralikni ta’minlash borasidagi chora-tadbirlar bunga misol bo‘la oladi. Bundan tashqari, hukumat tomonidan qator yirik investitsiya loyihalariga e’tibor qaratilgani ham ijobiy baholangan.

O‘zbekistonning davlat qarzi boshqa davlatlarga nisbatan past darajada ekani qayd etilgan. Buning sababi tashqi qarzlarning uzoq muddatli to‘lov shartlari va past foiz stavkalariga ega ekanligidir.

Ushbu qarzlar asosan yirik strategik loyihalarni moliyalashtirish uchun yo‘naltirilgan. Shunga qaramay, agentlik ogohlantirishicha, agar tashqi qarz va byudjet kamomadi kutilganidan yuqori bo‘lsa, reyting pasayishi mumkin.

Shu bilan birga, yuqori byudjet xarajatlari va qarz miqdorining oshishi reytingga salbiy ta’sir ko‘rsatishi ehtimoli mavjud. Reytingning yanada oshishi uchun byudjet kamomadini iqtisodiyotga zarar yetkazmasdan qisqartirish muhim omil sifatida qayd etilgan.

Biroq, jon boshiga to‘g‘ri keladigan YaIM darajasining pastligi, xomashyo narxlarining o‘zgaruvchanligi va cheklangan monetar siyosat moslashuvchanligi reytingning o‘sishini sekinlashtiruvchi omillar sifatida tilga olingan. S&P, shuningdek, qimmatbaho metallar, xususan, oltin narxlarining yuqori darajada bo‘lgani sababli O‘zbekistonning oltin-valyuta zaxiralari oshganini qayd etdi.

Ma’lumotlarga ko‘ra, oltin va boshqa metallar mamlakat eksportining qariyb 40 foizini tashkil etadi.