O‘zbekiston diplomlari 38 mamlakatda tan olinadi
O‘zbekiston oliy ta’lim tizimida yangi imkoniyatlar paydo bo‘lishi kutilmoqda. Bu haqda Zamin.uz xabar berdi.
Mamlakat “Oliy ta’lim sohasida malakalarni o‘zaro tan olish to‘g‘risidagi global konvensiya”ni ratifikatsiya qilganidan so‘ng, O‘zbekistonda berilgan diplomlar dunyoning 38 mamlakatida rasmiy tan olinishi ehtimoli yuzaga kelmoqda. Mazkur konvensiya Prezident tomonidan 11-noyabr kuni imzolandi.
Bu hujjat UNESCO tashabbusi bilan ishlab chiqilgan va global ahamiyatga ega bo‘lgan birinchi shartnoma sifatida muhim ahamiyat kasb etadi. Konvensiyaga ko‘ra, a’zo davlatlar bir-birining diplomlari va malakalarini adolatli tarzda tan olishi shart.
Faqat ta’lim standartlaridagi keskin farqlar mavjud bo‘lgandagina rad etish mumkin. Bugungi kunda ushbu shartnomaga 38 mamlakat qo‘shilgan.
Yevropa davlatlari orasida Fransiya, Buyuk Britaniya, Shvetsiya; Osiyo davlatlari orasida Yaponiya va Janubiy Koreya; Afrikada JAR va Senegal; Amerikada Urugvay va Ekvador; shuningdek, Avstraliya va Yangi Zelandiyani misol qilish mumkin. E’tiborga molik jihati shundaki, O‘zbekiston Markaziy Osiyoda ushbu konvensiyaga qo‘shilgan birinchi davlat bo‘ldi.
UNESCOga ratifikatsiya haqidagi hujjat topshirilgach, uch oy ichida O‘zbekiston to‘laqonli a’zo maqomiga ega bo‘ladi. Shu bilan birga, xorijda olingan diplomlarni O‘zbekistonda tan olish masalasi ham alohida tartibga ega.
Bu jarayon “Ta’lim to‘g‘risida”gi qonun va Vazirlar Mahkamasining 620-son qaroriga muvofiq amalga oshiriladi. Ayrim hollarda xalqaro shartnomalar asosida xorijiy diplomlar qo‘shimcha imtihonlarsiz tan olinishi mumkin.
Mazkur o‘zgarishlar o‘zbek talabalari, o‘qituvchilari va mutaxassislari uchun katta imkoniyatlar yaratadi. Bu nafaqat ta’lim sifatini oshirish, balki xalqaro darajada o‘z o‘rnini topish uchun keng platforma taqdim etadi.
