O‘zbekiston YuNESKOning oliy ta’lim konventsiyasiga qo‘shildi
O‘zbekiston YuNESKOning oliy ta’lim bo‘yicha malakalarni tan olishga oid Global konventsiyasini ratifikatsiya qildi. Bu haqda Zamin.uz xabar berdi.
Ushbu xalqaro hujjatga qo‘shilish orqali o‘zbekistonliklarning diplomlarini xorijiy davlatlarda tan olish jarayoni sezilarli darajada yengillashtiriladi. Konventsiyaga a’zo mamlakatlarda o‘zbek diplomlarini legallashtirish endilikda osonroq bo‘ladi.
Ratifikatsiya akti rasmiy ravishda YuNESKOga topshirilganidan keyin uch oy o‘tib, O‘zbekiston mazkur Konventsiya to‘liq ishtirokchisiga aylanadi. Bu esa o‘zbekistonliklarga Janubiy Koreya, Yaponiya, Avstraliya va Yangi Zelandiya kabi davlatlarda o‘z malakalarini tasdiqlashni soddalashtiradi.
Ushbu davlatlar nafaqat yuqori malakali mutaxassislarga ehtiyoj sezadi, balki diplomlarni tan olish jarayonining shaffofligi bilan ham ajralib turadi. Shuni alohida ta’kidlash lozimki, O‘zbekiston Markaziy Osiyoda ushbu Konventsiyaga qo‘shilgan birinchi davlat bo‘lib, dunyo bo‘yicha 39-davlat sifatida ro‘yxatga kiritiladi.
Bu yurtimizning xalqaro ta’lim tizimida o‘z o‘rnini mustahkamlashga xizmat qiladi. Manba: zamin.uz
