O‘zbekistonda organ transplantatsiyasi tartibi tasdiqlandi
O‘zbekistonda donor va qabul qiluvchilarni tekshirish hamda organ ko‘chirib o‘tkazish operatsiyalari uchun tibbiy xulosa berish tartibi tasdiqlandi. Bu haqda Zamin.uz xabar berdi.
Mazkur hujjat Adliya vazirligi tomonidan ro‘yxatga olingan. Yangi tasdiqlangan qoidalarga muvofiq, organ transplantatsiyasi jarayonida donor va qabul qiluvchi uch oy davomida to‘liq tibbiy ko‘rikdan o‘tishi zarur.
Ushbu ko‘rikka laboratoriya tahlillari hamda immunologik tekshiruvlar kiradi. Bu jarayon donor va qabul qiluvchining sog‘lig‘i holatini to‘liq baholash uchun muhim hisoblanadi.
Organ ko‘chirib o‘tkazishga ruxsat faqat davlat klinikalari konsiliumi tomonidan beriladi. Shifokorlar kengashida bemorning transplantatsiyaga ehtiyoji bor-yo‘qligi va donorning mos kelishi masalalari batafsil o‘rganiladi.
Agar operatsiya bemorning sog‘lig‘iga jiddiy zarar yetkazishi aniqlansa, masalan, ko‘rish, eshitish yoki gapirish qobiliyatining yo‘qolishi, ruhiy salomatlikning buzilishi yoki mehnatga layoqatning sezilarli darajada pasayishi xavfi mavjud bo‘lsa, tibbiy xulosa chiqarilmaydi. Mazkur qoidalar organ ko‘chirish jarayonining xavfsiz va qonuniy asosda amalga oshirilishini ta’minlashga qaratilgan.
