Komil Allamjonov AQShdagi vakolatli vakil etib tayinlandi
Komil Ismoilovich Allamjonov Prezident Administratsiyasining AQShdagi vakolatli vakili lavozimiga tayinlandi. Bu haqda Zamin.uz xabar berdi.
Ushbu qaror Prezident Administratsiyasi rahbari Saida Mirziyoyeva topshirig‘i bilan qabul qilingan. Allamjonov shu yilning iyun oyidan buyon jamoatchilik asosidagi mustaqil maslahatchi sifatidagi ishini ham davom ettiradi.
Mazkur tayinlov AQSh va O‘zbekiston o‘rtasidagi ishbilarmonlik va investitsiya kengashi faoliyati bilan bevosita bog‘liqdir. Ushbu kengash noyabr oyida prezident farmoniga muvofiq tashkil etilgan bo‘lib, uning asosiy vazifasi strategik biznes tashabbuslarini muvofiqlashtirish, yirik investitsiya loyihalarini rivojlantirish va nazorat qilishdan iboratdir.
Kengashni O‘zbekiston tomonidan Saida Mirziyoyeva, AQSh tomonidan esa maxsus vakil Serjio Gor boshqaradi. Farmonga muvofiq, 2026 yil 1 yanvardan boshlab O‘zbekistonning AQShdagi elchixonasi tarkibiga yangi lavozim – Maslahatchi elchi kiritilishi belgilandi.
Ushbu lavozim egasi Prezident Administratsiyasi rahbariga hisobot beradi va ikki tomonlama aloqalarni rivojlantirishda O‘zbekistonning AQShdagi diplomatik vakolatxonasi rahbariga ko‘maklashadi.
