Yaponiyada o‘zbekistonliklar uchun yangi ish o‘rinlari taklif etilmoqda. Bu haqda Zamin.uz xabar berdi.
Migratsiya agentligi va Proud Partners kompaniyasi hamkorligida 250 ta yetkazib beruvchi haydovchi va 150 ta qurilish sohasi vakillari uchun ish imkoniyatlari yaratilgan. Ushbu ish o‘rinlari uchun nomzodlar 1–2 dekabr kunlari Toshkent shahrida o‘tkaziladigan tanlov orqali saralab olinadi.
Haydovchilar uchun talablar quyidagicha: B yoki C toifasidagi haydovchilik guvohnomasi, 21–35 yosh oralig‘i va xavfsizlik qoidalariga rioya qilish majburiy. Qurilish sohasi ishchilari esa 18–35 yoshda bo‘lishi va intizomli bo‘lishi kerak.
Ish beruvchi tomonidan 2000 dollardan boshlanuvchi maosh, yiliga ikki marta bonus, turar joy, tibbiy sug‘urta va aviachipta xarajatlari qoplanadi. Yapon yoki ingliz tilini biladigan nomzodlar ustunlikka ega bo‘ladi.
Bundan tashqari, Angrenda bepul yapon tili kurslari tashkil etilishi rejalashtirilgan. Bu tashabbus O‘zbekiston fuqarolarini yuqori maoshli va qonuniy ish o‘rinlariga yo‘naltirish maqsadida amalga oshirilayotgan keng qamrovli ishlarning bir qismi hisoblanadi.
Xorijda ishlayotgan fuqarolar tomonidan yuborilayotgan mablag‘lar hajmi ham ortib borayotgani kuzatilmoqda. Manba: zamin.uz.
