Nyu-York meri Erik Adams Toshkentdagi Islom markazida bo‘ldi
Nyu-York shahri meri Erik Adams Toshkentda joylashgan Islom sivilizatsiyasi markaziga delegatsiya boshlig‘i sifatida tashrif buyurdi. Bu haqda Zamin.uz xabar berdi.
Ushbu markaz O‘zbekiston Respublikasi Prezidenti Shavkat Mirziyoyev tashabbusi bilan tashkil etilgan bo‘lib, uning asosiy maqsadi islom madaniy merosini o‘rganish va keng jamoatchilikka yetkazishdir. Tashrif davomida mehmonlarga markazning faoliyati, uning ilmiy-ma’rifiy yo‘nalishlari va tarixiy ahamiyati haqida batafsil ma’lumot berildi.
Markazda qadimiy qo‘lyozmalar, noyob artefaktlar va zamonaviy texnologiyalar yordamida yaratilgan interaktiv ekspozitsiyalar mavjud. Erik Adams ushbu markazga tashrif buyurgach, islom dinining tinchlik, insonparvarlik va ulug‘ sivilizatsiya merosini yanada chuqurroq anglaganini ta’kidladi.
U shuningdek, markaz har bir kishiga islomning jahon sivilizatsiyasiga qo‘shgan ulkan hissasini obyektiv ravishda ko‘rish imkonini berishini qayd etdi. Erik Adamsning so‘zlariga ko‘ra, markazda video kontent, interaktiv texnologiyalar va sun’iy intellekt asosida tashkil etilgan ekspozitsiyalar mehmonlarda kuchli taassurot qoldiradi.
Bunday zamonaviy yondashuv ko‘rgazmalarni barcha yoshdagi insonlar uchun tushunarli va qiziqarli qiladi. Tashrif davomida Nyu-York meri islomgacha bo‘lgan davr va Birinchi Uyg‘onish davriga bag‘ishlangan ekspozitsiyalar bilan yaqindan tanishdi.
U Qur’oni karim zali va boshqa bo‘limlarga ham tashrif buyurib, u yerdagi boy madaniy va ilmiy merosni o‘rgandi. Eslatib o‘tamiz, Birinchi Uyg‘onish IX-XII asrlarda Buxoro, Samarqand, Xorazm va mintaqaning boshqa shaharlarida ilm-fan, madaniyat va falsafaning yuksalgan davrini ifodalovchi ilmiy atama hisoblanadi.
