Samarqand shahri hududiy jihatdan kengayib, yanada rivojlanmoqda. Bu haqda Zamin.uz xabar berdi.
Prezident matbuot xizmatining ma’lum qilishicha, Oqdaryo, Payariq, Pastdarg‘om, Toyloq va Samarqand tumanlaridan jami 17,5 ming gektar yer shaharga qo‘shiladi. Ushbu o‘zgarish natijasida shahar aholisi 604 mingdan 882 ming nafargacha oshishi kutilmoqda.
Shahar infratuzilmasini yaxshilash maqsadida uchta yirik massiv — «Shirin», «Temiryo‘l orti» va «Qorasuv-2»da 700 dan ortiq ko‘p qavatli uylar qurilishi rejalashtirilgan. Bu uylar 300 mingdan ziyod aholiga zamonaviy yashash sharoitlarini taqdim etadi.
Yangi hududlarda maktablar, bolalar bog‘chalari, shifoxonalar, oliy ta’lim muassasalari, savdo va biznes markazlari, mehmonxonalar hamda dam olish maskanlari barpo etilishi ko‘zda tutilgan. Shuningdek, 49 ta viloyat tashkilotini «Shirin» massiviga ko‘chirish ishlari kelgusi yilda amalga oshiriladi.
Yil oxirigacha «Qoradaryo» ustidan o‘tuvchi 577 metr uzunlikdagi ko‘prik foydalanishga topshiriladi. Bu yangi massivni shahar markazi bilan bog‘lashni osonlashtiradi.
Bundan tashqari, ispan investorlar bilan hamkorlikda uch massivning kanalizatsiya tizimini to‘liq yangilash ishlari olib boriladi. Yuk transporti harakatini cheklash maqsadida magistral yo‘l bo‘ylab to‘rtta logistika markazi qurilishi ham rejalashtirilgan.
Samarqandning ushbu kengayishi qadimiy shaharni yanada zamonaviy, qulay va imkoniyatlarga boy megapolisga aylantirishga xizmat qiladigan muhim qadam sifatida baholanmoqda.
