Samarqandda yangi ekoshahar qurilishi e’lon qilindi
25-noyabr kuni Xalq deputatlari Samarqand viloyati Kengashining navbatdan tashqari sessiyasi bo‘lib o‘tdi. Bu haqda Zamin.uz xabar berdi.
Unda O‘zbekiston Respublikasi Prezidenti Shavkat Mirziyoyev ishtirok etdi. Davlat rahbari viloyat jamoatchiligi bilan uchrashuvdan mamnun ekanligini aytib, Samarqandning boy tarixi, erishilgan yutuqlar va hali foydalanilmagan imkoniyatlariga to‘xtaldi.
Prezidentning so‘zlariga ko‘ra, Samarqand qadimiy madaniyat va zamonaviy taraqqiyot uyg‘unlashgan hudud sifatida jahon sivilizatsiyasida o‘z o‘rnini mustahkamlamoqda. So‘nggi yillarda viloyatda turizm salohiyati sezilarli darajada oshdi.
Xususan, “Boqiy shahar” majmuasi barpo etildi, xalqaro aeroport yangidan qurildi, zamonaviy mehmonxonalar ish boshladi. Shu yilning o‘zida viloyatda 40 dan ortiq xalqaro anjumanlar o‘tkazildi, jumladan, UNESCO Bosh konferensiyasining 43-sessiyasi ulkan voqealardan biri bo‘ldi.
Turizm va unga yaqin sohalarga 1 milliard dollar miqdorida investitsiya kiritilgani natijasida Samarqandga sayyohlar oqimi 2016-yildan beri 7 barobar oshdi. Turizm xizmatlari eksporti esa 600 million dollarga yetdi.
Buning ortidan viloyat sanoat, qishloq xo‘jaligi va xizmat ko‘rsatish sohalarida ham sezilarli o‘sishga erishmoqda. O‘tgan sakkiz yilda viloyatga 12 milliard dollar investitsiya kiritilib, 600 mingdan ortiq doimiy ish o‘rni yaratildi.
Tadbirkorlar soni ikki barobar oshdi, sanoat korxonalari soni esa 1,5 barobar ko‘paydi. Urgut tumani ham iqtisodiy rivojlanishning yetakchi hududlaridan biriga aylandi.
Bu yerda sanoat, qishloq xo‘jaligi va xizmat ko‘rsatish sohalarida yirik loyihalar amalga oshirilmoqda. Yaqinda tumanda 55 kilometr uzunlikdagi temir yo‘l liniyasi ishga tushirildi.
Kelgusida ushbu tarmoq elektrlashtiriladi, bu esa tuman iqtisodiyoti va aholining turmush sharoitlarini yanada yaxshilashga xizmat qiladi. Prezident Urgut markazida “Yangi O‘zbekiston” loyihasi doirasida zamonaviy shahar barpo etilishini e’lon qildi.
Bu yerda 90 gektar maydonda yangi ekoshahar quriladi. Shuningdek, Samarqand shahrining chegarasi kengaytirilib, unga qo‘shni tumanlardan 17,5 ming gektar yer qo‘shiladi.
Yangi massivlarda ko‘p qavatli uylar, maktablar, bog‘chalar, shifoxonalar, savdo va biznes markazlari bunyod etiladi. Prezident yig‘ilishda Samarqand viloyati hokimi lavozimiga Adiz Boboyev nomzodini tavsiya etdi.
Deputatlar ovoz berish natijasida uni viloyat hokimi etib tasdiqladi. Yangi hokimga viloyatni iqtisodiy va ijtimoiy rivojlantirish bo‘yicha muhim vazifalar yuklatildi.
Yig‘ilish yakunida davlat rahbari mas’ullarning hisobotlarini tinglab, kelgusi rejalarni belgilab berdi. Manba: zamin.uz
