Samarqand hududi kengayib, aholisi 882 mingga yetadi
Samarqand shahri hududi kengaymoqda. Bu haqda Zamin.uz xabar berdi.
Prezident matbuot xizmati rahbari Sherzod Asadovning ma’lum qilishicha, Oqdaryo, Payariq, Pastdarg‘om, Toyloq va Samarqand tumanlarining ayrim qismlari shaharga qo‘shilishi natijasida hudud maydoni 17,5 ming gektarga kengayadi. Shu bilan birga, aholining soni hozirgi 604 mingdan 882 ming kishiga yetishi kutilmoqda.
Shahar aholisining o‘sishi bilan zamonaviy uy-joylarga talab ortmoqda. Ushbu ehtiyojni qondirish maqsadida uchta yirik massivda ko‘p qavatli uylar qurilishi rejalashtirilgan.
Jumladan, “Shirin” massivi 180 ming, “Temiryo‘l orti” 100 ming, “Qorasuv-2” esa 30 ming aholiga mo‘ljallangan bo‘ladi. Ushbu hududlarda maktablar, bolalar bog‘chalari, oliy ta’lim muassasalari, shifoxonalar, biznes markazlari, savdo majmualari va dam olish maskanlari ham quriladi.
Bundan tashqari, Samarqand viloyatining 49 ta tashkiloti kelasi yilda “Shirin” massiviga ko‘chiriladi. Yil oxiriga qadar “Qoradaryo” ustidan uzunligi 577 metr bo‘lgan yangi ko‘prik foydalanishga topshirilishi rejalashtirilgan.
Shuningdek, ispaniyalik investorlar bilan hamkorlikda uchta massivda kanalizatsiya tizimi to‘liq modernizatsiya qilinadi. Shahar infratuzilmasini yaxshilash maqsadida yuk mashinalari oqimini kamaytirish uchun Oqdaryo, Toyloq va Samarqand tumanlarida magistral yo‘l bo‘ylab to‘rtta logistika markazi qurilishi ham ko‘zda tutilgan.
Bu loyihalar Samarqandning iqtisodiy va ijtimoiy rivojlanishiga xizmat qiladi (manba: one.uz).
