O‘zbekiston Prezidenti Shavkat Mirziyoyev Toshkent shahridagi ekologik vaziyatni yaxshilash uchun muhim qaror qabul qildi. Bu haqda Zamin.uz xabar berdi.
Ushbu qarorga ko‘ra, shaharda maxsus ekologik komissiya tashkil etiladi. Komissiya shahardagi ekologik holatni nazorat qilish, zarur choralarni ko‘rish va cheklovlarni joriy etish bilan shug‘ullanadi.
Mazkur komissiya havoni ifloslantiruvchi issiqxonalar va boshqa obyektlarning faoliyatini vaqtincha to‘xtatish vakolatiga ega bo‘ladi. Shuningdek, sanoat korxonalarida zamonaviy filtrlar o‘rnatilishi va ekologiya bo‘yicha ilgari qabul qilingan qarorlarning bajarilishini ta’minlash ustidan qat’iy nazorat olib boriladi.
AI-80 markali benzindan voz kechish bo‘yicha tadbirlar ham komissiya nazoratida bo‘ladi. Komissiya daryolar va kanallarning suvni himoya qilish hududlarida qurilishlarni taqiqlash huquqiga ega.
Bundan tashqari, chang ifloslanishi yuqori bo‘lgan vaqtda korxonalar faoliyati va transport harakatiga cheklovlar joriy etilishi mumkin. Masalan, yuk avtomobillarining shaharga kirishi vaqtincha to‘xtatilishi yoki transport harakati juft va toq kunlarga bo‘linishi mumkin.
Ushbu cheklovlar elektromobillarga tatbiq etilmaydi. Qurilish sohasida changga qarshi kurash uskunalaridan foydalanish majburiy qilib belgilandi.
Komissiya qarorlari barcha davlat tashkilotlari, muassasalar va fuqarolar uchun majburiy hisoblanadi. Ushbu chora-tadbirlar Toshkent shahrida ekologik muammolarni kamaytirishga xizmat qiladi.
Manba: zamin.uz.
