Toshkentda daraxtlarni kun davomida sug‘orish mumkin
Toshkent shahrida daraxt va o‘simliklarni sug‘orish bo‘yicha cheklovlar rasmiy ravishda bekor qilindi. Bu haqda Zamin.uz xabar berdi.
Prezident Shavkat Mirziyoyevning farmoniga muvofiq, endilikda shahar hududida bahor va yoz mavsumlarida daraxtlar va yashil hududlarni sug‘orish kun davomida amalga oshirilishi mumkin. Bungacha sug‘orish faqat yarim tundan ertalab soat 5:00 gacha ruxsat etilgan edi.
Shahar hokimligi ma’lumotiga ko‘ra, bu qaror ekologik sharoitni yaxshilash va yashil hududlarni kengaytirishga qaratilgan. Shuningdek, asosiy yo‘llar bo‘ylab butalarni haftasiga kamida uch marotaba yuvish choralari ko‘riladi.
Ko‘p qavatli uylar esa suv tejovchi maxsus rezervuarlar bilan jihozlanadi. Mazkur chora-tadbirlar tufayli shahar atrof-muhitining namlik darajasi oshadi, chang miqdori kamayadi va kislorod bilan boyitiladi.
Bu esa aholining yashash sharoitlarini yaxshilashga, ko‘chalarni qulayroq va yashilroq bo‘lishiga xizmat qiladi.
