O‘zbekiston muzliklari tez erib bormoqda
O‘zbekiston tog‘laridagi muzliklar so‘nggi yillarda keskin qisqarayotgani kuzatilmoqda. Bu haqda Zamin.uz xabar berdi.
Mutaxassislarning qayd etishicha, atigi ikki yil ichida muzliklarning qalinligi 5 metrdan ortiq kamaygan. Joriy yilda esa bu ko‘rsatkich 4 metrga yetgan.
Ushbu jarayon tog‘ ekotizimiga, suv resurslariga va iqlim barqarorligiga salbiy ta’sir ko‘rsatishi mumkin. Muzliklarning bunday tez erishi bir necha sabablar bilan izohlanmoqda.
Asosiy omil — global isishning kuchayishi. Harorat yildan-yilga oshib borayotgani muzliklarning massasini yo‘qotishiga olib kelmoqda.
Bundan tashqari, yog‘ingarchilikning kamayishi va atmosfera haroratining o‘rtacha ko‘tarilishi ham jarayonni jadallashtirayotgan omillar sirasiga kiradi. Muzliklarning qisqarishi O‘zbekistonning suv resurslariga jiddiy ta’sir ko‘rsatmoqda.
Tog‘larda saqlanayotgan muzlar yoz oylarida daryolarni suv bilan ta’minlaydi. Agar muzliklarning erishi hozirgi sur’atda davom etsa, kelajakda suv tanqisligi yuzaga kelishi mumkinligi haqida ogohlantirilmoqda.
Bugungi kunda ekologiya nafaqat O‘zbekiston uchun, balki butun dunyo uchun dolzarb muammolardan biri hisoblanadi. Mutaxassislar tabiatni muhofaza qilish, resurslardan oqilona foydalanish va atrof-muhitga zarar yetkazuvchi omillarni kamaytirish zarurligini ta’kidlamoqda.
Tabiatni asrash borasida qilingan har bir amaliy ish kelajak avlodlar uchun muhim ahamiyatga ega. Manba: Zamin.uz
