O‘zbekistonda 800 ta eskirgan qonun bekor qilinadi
O‘zbekistonda qonunchilikni takomillashtirish va ortiqcha hujjatlarni bekor qilish maqsadida yangi tizim joriy etiladi. Bu haqda Zamin.uz xabar berdi.
Prezident Shavkat Mirziyoyev tomonidan bu borada tegishli farmon imzolanganini Adliya vazirligi ma’lum qildi. Ushbu farmon asosida mamlakatda qariyb 800 ta eskirgan qonun va hujjatlar bekor qilinishi rejalashtirilgan.
Shuningdek, tadbirkorlar uchun moliyaviy operatsiyalarni E-aktiv tizimida qayd etish majburiyati bekor qilinadi. Bu o‘z navbatida tadbirkorlik faoliyatini yuritishda qulayliklar yaratadi.
Bundan tashqari, ko‘chmas mulk garovini ro‘yxatga olish bo‘yicha davlat xizmatlari narxi ikki barobar arzonlashtirilishi ko‘zda tutilgan. Farmonda nogironligi bo‘lgan shaxslarning huquqlarini kengaytirishga ham alohida e’tibor qaratilgan.
Yer uchastkasi huquqini ro‘yxatdan o‘tkaza olmagan shaxslar uchun muqobil hujjatlar asosida soliq imtiyozlaridan foydalanish imkoniyati yaratiladi. Ushbu chora-tadbirlar jamiyatda ijtimoiy tenglikni ta’minlashga xizmat qiladi.
Manba: One.uz
