O‘zbekistonda qayta tiklanuvchi energiya ulushi oshmoqda
O‘zbekiston energetika sohasida qayta tiklanuvchi energiya manbalarining ulushini oshirish bo‘yicha faol ish olib bormoqda. Bu haqda Zamin.uz xabar berdi.
Joriy yil boshidan buyon mamlakatda ishlab chiqarilgan elektr energiyasining 23 foizi qayta tiklanuvchi energiya manbalaridan olingan. Energetika vazirligi ma’lumotlariga ko‘ra, bu ko‘rsatkich 2030 yilga borib 54 foizga yetkazilishi rejalashtirilgan.
Bugungi kunda O‘zbekistonda jami quvvati 4,7 ming MVt bo‘lgan 13 ta quyosh va 5 ta shamol elektr stansiyasi faoliyat ko‘rsatmoqda. Ushbu stansiyalar tomonidan 9,7 milliard kilovatt-soat elektr energiyasi ishlab chiqarilgan.
Bu natijada 2,8 milliard kub metr tabiiy gaz tejashga va 4,2 million tonna zararli moddalar chiqindisini kamaytirishga erishilgan. Shuningdek, xususiy sektor va ijtimoiy inshootlarda quyosh panellarini o‘rnatish ishlari davom etmoqda.
Ularning umumiy quvvati 1,9 ming MVtni tashkil qiladi. Bundan tashqari, 4,85 million litr hajmda quyosh suv isitish kollektorlaridan foydalanilmoqda.
Bu orqali qo‘shimcha 761 million kub metr gaz tejash va 905 ming tonna zararli moddalar chiqindisini kamaytirishga muvaffaq bo‘lingan. Issiqlik elektr stansiyalarida ham zamonaviy ekologik texnologiyalar joriy etilmoqda.
Toshkent issiqlik elektr markazida yangi gaz turbinali qurilmalar, avtomatik monitoring tizimlari va filtrlash uskunalari o‘rnatilib, yiliga 200 tonna zararli moddalar chiqindisini kamaytirishga erishilgan. Bundan tashqari, «Yashil makon» loyihasi doirasida 2025 yilgacha yoqilg‘i-energetika kompleksi korxonalari tomonidan 2,5 milliondan ortiq daraxt ekilishi va ishlab chiqarish obyektlari atrofida yangi ekologik zonalar tashkil etilishi rejalashtirilgan.
Ma’lumot manbasi: one.uz.
