Iqtisodiyot va moliya vazirligining 2026-yil uchun Byudjetnoma hujjatiga ko‘ra, O‘zbekistonda ish haqi, pensiya va ijtimoiy nafaqalar 2030-yilga qadar inflyatsiyadan yuqori darajada oshirib borilishi rejalashtirilgan. Bu haqda Zamin.uz xabar berdi.
Ushbu chora-tadbirlar aholining real daromadlarini oshirish va ijtimoiy himoyani mustahkamlashga qaratilgan. Hujjatda davlat pensiya tizimida islohotlar amalga oshirilishi ko‘zda tutilgan.
Xususan, Pensiya jamg‘armasini davlat mablag‘lari hisobidan moliyalashtirish hajmi bosqichma-bosqich qisqartiriladi. 2026-yil boshida Pensiya jamg‘armasi qoldig‘i 3,9 trillion so‘mni tashkil etishi, daromadlari 64,7 trillion so‘m, xarajatlari esa 86,1 trillion so‘m bo‘lishi prognoz qilingan.
Kelgusi yilda byudjetdan 23 trillion so‘m miqdorida transfert ajratilishi rejalashtirilgan. 2027-yilda bu ko‘rsatkich 20 trillion so‘mga, 2028-yilda esa 18 trillion so‘mga kamayishi kutilmoqda.
Shu bilan birga, jamg‘arma daromadlari 2027-yilda 75 trillion so‘mga, 2028-yilda esa 87,8 trillion so‘mga yetishi taxmin qilinmoqda. Ammo xarajatlar ham mos ravishda oshib, 2027-yilda 95,1 trillion so‘mni, 2028-yilda esa 104,8 trillion so‘mni tashkil etadi.
Yaqin uch yil ichida pensiya oluvchilar soni 489 ming kishiga ko‘payib, umumiy miqdor 4,76 million nafarga yetishi kutilmoqda. Har yili pensiya yoshiga yetadigan fuqarolar soni 5,1 foizga oshadi.
Shu bilan birga, byudjet tashkilotlari xodimlarining ish haqi har 1 foizga oshirilganda, davlat xarajatlari 1,67 trillion so‘mga ortadi. Pensiyalarni har 1 foizga oshirish esa 861 milliard so‘m qo‘shimcha mablag‘ talab qiladi.
Ijtimoiy nafaqa oladigan oilalar soni 10 foizga ko‘payganda, byudjet xarajatlari 1,6 trillion so‘mga oshadi. Bu ma’lumotlar byudjet siyosatini yanada puxta rejalashtirish zarurligini ko‘rsatmoqda.
