O‘zbekistonda O‘zbek–Fransuz universiteti tashkil etiladi. Bu haqda Zamin.uz xabar berdi.
Prezident Shavkat Mirziyoyev mamlakatda yuqori malakali kadrlar tayyorlashni yangi bosqichga olib chiqish maqsadida «O‘zbek–Fransuz universitetini tashkil etish chora-tadbirlari to‘g‘risida»gi qarorni imzoladi. Ushbu qaror O‘zbekiston va Fransiya o‘rtasidagi ta’lim sohasidagi hamkorlikni mustahkamlash, zamonaviy ta’lim standartlarini joriy etish va yoshlar uchun xalqaro talablarga javob beruvchi imkoniyatlar yaratishni ko‘zda tutadi.
Qarorga binoan, universitet O‘zbekiston qonunchiligi va Fransiya universitetlari konsorsiumi tavsiyalari asosida faoliyat yuritadi. Bu esa ta’lim jarayonining jahon standartlariga mos ravishda tashkil etilishini ta’minlaydi.
Dastlab universitetda magistratura yo‘nalishlari bo‘yicha o‘quv jarayoni boshlanadi. Keyinchalik esa talab yuqori bo‘lgan sohalar uchun bakalavriat va doktorantura dasturlari ham ochilishi rejalashtirilgan.
Bundan tashqari, abituriyentlarni qabul jarayoniga tayyorlash uchun maxsus kurslar tashkil etilishi ko‘zda tutilgan. Universitetda ta’lim davlat grantlari va to‘lov-kontrakt asosida amalga oshiriladi.
Bitiruvchilarga ikki xil diplom berilishi mumkin: biri universitetning o‘z diplomi, ikkinchisi esa Fransiya universitetlari konsorsiumiga kiruvchi ta’lim dasturi asosida berilgan xalqaro diplomdir. Ushbu hujjatlar O‘zbekiston hududida to‘liq tan olinadi va talabalar uchun xorijda ham ish va o‘qish imkoniyatlarini kengaytiradi.
Yangi universitetning tashkil etilishi mamlakat oliy ta’lim tizimida muhim qadam bo‘lib, yoshlarga zamonaviy bilimlar, xalqaro yondashuv va amaliyotga yaqinlashgan ta’lim muhitini taqdim etadi. Bu tashabbus yoshlarning kelajagini ta’minlashda va mamlakatning intellektual salohiyatini oshirishda muhim ahamiyat kasb etadi.
